Kryeministri Edi Rama ka bërë të ditur se në mbledhjen e sotme të Këshillit të Ministrave janë miratuar një sërë vendimesh pas tërmetit të fuqishëm që goditi vendin të shtunën e 21 shtatorit.
Vendimet, siç bëri të ditur Rama, bazohen në ndihmën ndaj familjeve të prekura nga tërmeti si dhe marrjen e masave që në raste të ngjashme të shmangen dëmtime.
Mes të tjerash, tha se “s’do jepen më leje ndërtimi pa policën e sigurimit”.
“Kemi ndërtuar një punë me disa korsi dhe sot në këtë komunikim do të përqëndrohem tek korsia e punës së Këshillit të Ministrave duke iu referur buxhetit por edhe pushtetit ekzekutiv dhe vendimmarrës në raport me një sërë masash që besoj se ka ardhur koha të merremi. Akti normativ i buxhetit të këtij viti, garanton edhe përdorimin e Fondit Rezervë, për përballimin e situatës emergjente. Parashikon përjashtimin nga taksat për të gjithë investimet mbi banesat e dëmtuara si pasojë e tërmetit. Nisur nga fakti se prokurimet me vlerë të vogël janë procedura të shtuara brenda një afati të shkurtër kemi vendosur të përjashtojmë këtë periudhë rregullin dhe të lejohen vetëm familjet e prekura nga tërmeti të plotësojnë nevojat proceduriale me një vlerë të vogël deri në 10 milion lekë të vjetra. Po ashtu kemi vendosur që të sigurojmë një ekzaminim të plotë edhe për ashensorët ku personat përgjegjës nuk disponojnë dokumentacionin e plotë. Objekti është të siguroheni se ashensorët në përdorim plotësojnë kriteret dhe nuk janë prekur teknikisht pas tërmetit. Është një impakt afatgjatë që parashikon masa detyruese për ndërtuesit, zhvilluesit për të të lidhur një kontratë sigurimi me një afat 10 vjeçar më përfituesit, ku mbulohen dëmet ndaj të tretëve ku për shkak të terrenit apo defekteve, ndërtimi shembet plotësisht apo pjesërisht. Projektligji për disa shtesa dhe ndryshime për kontrollin e cilësisë së ndërtimit do të kryejnë oponencën teknike mbi çdo godinë publike apo private me akses publik. Do të parashikohen edhe për objektet që kanë mbi 50 vite që janë ndërtuar”, tha Rama.
“Kemi marrë vendim për një sërë studimesh të thelluara që lidhen me fenomen natyre, se tërmeti është një prej tyre, por s’është për fat të mirë sa ç’janë për shembull përmbytjet, apo siç mund të jenë zjarret dhe të ngjashme”, shtoi.
