Nga Boldnews.al
Agron Hetoja, drejtori multi-milioner i Autoritetit Kombëtar të Ushqimit (AKU), u shkarkua nga detyra në mbledhjen e sotme të qeverisë, me propozim të Ministrit të Bujqësisë dhe Zhvillimit Rural.
Në vend të tij, po sot, është emëruar kreu i ri i këtij insititucioni, Robert Lili, i cili ka mbajtur detyrën e kreut të OSHEE Gjirokastër.
“Ky vendim është marrë në kuadër të procesit të ristrukturimit që do t’i bëhet AKU-së, ndryshimeve ligjore që pritet të kalohen në Parlament dhe gjithë transformimit që do të pësojë institucioni më i rëndësishëm i sigurisë ushqimore në vend”, njoftoi zyrtarisht AKU.
Gjatë ditëve të fundit, “Boldnews.al” ka raportuar mbi problematikat që konstatohen në pasurinë e Agron Hetojas, i cili u emërua në krye të AKU-së pasi mbajti për rreth 6 vjet postin e Administratorit të Korporatës Elektro Energjitike Shqiptare.
Agron Hetoja, sipas hulumtimeve të “Boldnews.al”, rezulton të ketë burim të paqartë për mbi 12 llogari bankare, të deklaruara në formularin “para fillimit të detyrës”, vlera e të cilave arrin në rreth 190 mijë euro.
Gjithashtu, Hetoja ka blerë në vitin 2005 një apartament me vlerë 39 mijë dollarë pranë Arkivës së Tiranës, zonë ndër më të shtrenjtat në kryeqytet dhe që çmimet e shitjes së pronave, në atë vit, kanë qenë më të larta se pagesa që ka kryer drejtori aktual i AKU-së.
Këtë apartament, Agron Hetoja ia ka shitur mbesës së tij në vitin 2018, me vlerë 170 mijë euro.
Në fund të vitit 2017, pra pak se të shiste apartamentin e mëparshëm, Agron Hetoja blen një apartament tjetër, në vlerë rreth 200 mijë euro, në zonën e ish-Bllokut, pranë fakultetit të Drejtësisë.
Si burim për blerjen e këtij apartamenti, Hetoja ka deklaruar prishjen e pjesës më të madhe të llogarive bankare, të deklaruara që kur mori detyrën e Administratorit të KESH sh.a., në vitin 2013.
LEXO EDHE:
*Rasti “Agron Hetoja”/ ILDKPKI verifikon pasurinë e kreut të AKU, dyshime për pastrim parash
*Agron Hetoja i AKU/ Kontratë fiktive? Apartament me çmim të lirë në zonën luksoze të Tiranës
*Pasuria/ Agron Hetoja i AKU, 12 llogari bankare me mijëra euro, burimi i paqartë
*Agron Hetoja i AKU i shet mbesës 140 mijë euro apartamentin që bleu 39 mijë USD
*Agron Hetoja i AKU, boss-i më i ri i Bllokut, blen apartament 200 mijë euro
