Nga Boldnews.al
Agron Hetoja, aktualisht drejtor i Autoritetit Kombëtar të Ushqimit (AKU), është një prej banorëve më të rinj të zonës së shtrenjtë të ish-Bllokut, pasi në vitin 2017, kur ishte ende Administrator i KESH. Sha, ka blerë një apartament në shumën 200 mijë euro.
Në deklaratën e pasurisë për vitin 2017, Hetoja deklaron se ai dhe bashkëshortja e tij kanë zbrazur 11 llogari bankare, shumat e të cilave “janë përdorur për pagesa pjesore për konytratë sipërmarrje (apartament +garazhe)”.
Subjekti Hetoja, në atë kohë në krye të Korporatës Elektro Energjitike Shqiptare, nuk ka deklaruar asnjë të dhënë mbi sipërfaqen e apartamentit dhe garazhit/garazheve, zonën se ku ndodhet, si edhe çmimim të cilin ka paguar për këto asete të paluajtshme.
“Boldnews.al” kreu disa verifikime, në bazë të të cilave rezultoi se apartamenti i ri i Agron Hetoja ndodhet në një prej zonave më luksoze të Tiranës, dhe natyrisht më të shtrenjta, në një godinë të ndërtuar së fundmi në hapësirën mes Presidencës dhe Fakultetit të Drejtësisë.
Të dhënat e siguruara nga “BN” dëshmojnë gjithashtu se Agron Hetoja ka paguar 185 mijë euro për apartamentin dhe 15 mijë euro për garazhin, në total 200 mijë euro.
Në formularin e pasurisë, dorëzuar në Mars 2018 për pasuritë e një viti më parë, drejtori aktual i AKU-së deklaron si burim për pagesën e apartamentit prishjen e 8 llogarive bankare në emër të tij dhe 3 llogarive bankare në emër të bashkëshortes.
Në bazë të llogarive të thjeshta aritmetike, nga prishja e këtyre llogarive bankare, Agron Hetoja ka grumbulluar rreth 190 mijë euro, të cilat më pas janë përdorur për pagesën, sipas kontratës së sipërmarrjes, për apartamentin e ri.
Në secilën prej shënimeve “prishje depozite”, Agron Hetoja deklaron në formular se shumat janë përdorur për “pagesa pjesore për kontratën e sipërmarrjes”, pa specifikuar qartësisht nëse të gjitha vlerat e parave që ka pasur në banka i ka përdorur për blerjen e asetit të ri.
Agron Hetoja ka deklaruar pasurinë për herë të parë në vitin 2013, në kohën kur Edi Rama e emëroi Administrator të Korporatës Elektroenergjitike Shqiptare (KESH sh.a).
Hetoja, një ish-specialist dhe menaxher në disa projekte ndërkombëtare për Shqipërinë, deklaroi në formularin fillestar një numër të konsiderueshëm llogarish bankare, të cilat, sipas vetëdeklarimit, ishin krijuar nga të ardhurat e tij dhe bashkëshortes së tij ndër vite.
Gjatë drejtimit të KESH. Sh.a, Agron Hetoja shtoi në mënyrë periodike shifrat në llogaritë e tij bankare, duke deklaruar në çdo rast si burim të ardhurat nga angazhimi publik.
“Boldnews.al” ka raportuar edhe më parë mbi numrin e lartë të llogarive bankare të Hetojas, shifrat e konsiderueshme, si edhe faktin që ILDKPKI, institucioni përgjegjës për verifikimin e pasurive nuk ka konstatuar, të paktën publikisht, problematika në vetëdeklarimin e Agron Hetoja.
Gjithësesi, duhet mbajtur në vëmendje se Inspektorati i Lartë i Deklarimit dhe Kontrollit të Pasurive dhe Konfliktit të Interesave (ILDKPKI) ka një politikë institucionale, në bazë të të cilës nuk informon publikun mbi shkeljet e mundshme nga subjektet, por vetëm strukturat përgjegjëse.
