Ish-Presidenti Bujar Nishani tha në studion e emisionit “Aktualitet” në Fax News se Ilir Meta nuk do të shkarkohet nga detyra e Kreut të Shtetit.
Ai u shpreh se e gjithë ajo çfarë flitet është një zhurmë e pistë e mazhorancës.
“Nuk do të shkarkohet Presidenti, kjo është vetëm një zhurmë e pistë. Nuk e shkarkon Parlamenti, Presidentin, por Gjykata Kushtetuese, sa për këtë të fundit, e dimë të gjithë se ka 3 vite që është jo funksionale”, tha ai.
Nishani foli edhe për marrëdhëniet që ka me kreun e Partisë Demokratike Lulzim Bashën, me të cilin tha se takohet shpesh, si dhe përmendi disa nga pikat e tij të forta.
“Jemi takuar shpesh, para disa ditësh ishim në një nga forumet më të larta të partisë. Besoj plotësisht në objektivat e Lulzim Bashës dhe të Partisë Demokratike por edhe të aleancës së madhe të opozitës politike në vend.
Besoj tek kauza e saj. Basha jo vetëm që dëgjon, por merr edhe çfarë i duket e drejtë nga bashkëbiseduesit. Ka një avantazh të madh që është mosha e re, energjia e re, por edhe bashkëpunimi, kultura dhe alenca që e karakterizon e karakterizon qoftë me aleatët qoftë me qytetarët dhe mbështetësit”, tha Nishani.
