Nga Boldnews.al
Këshilli i Lartë i Prokurorisë, pas më shumë se 10 muajsh funksionim, më në fund ka konstatuar problematikat e Arta Markut në caktimin e paligjshëm të drejtuesve të prokurorive, megjithëse, ende nuk ka reflektuar për ndryshimin e situatës.
Në mbledhjen e fundit, të zhvilluar mesjavën e kaluar, anëtarët e KLP-së kanë vlerësuar të nevojshme ndërprerjen e caktimit të përkohshëm të rreth 10 prokurorëve të thjeshtë, të cilët ushtronin funksionet jashtë strukturave ku kanë emërimin zyrtar.
Por, Këshilli i Lartë i Prokurorisë nuk ka arritur të sistemojë çështjen e drejtuesve të Prokurorive lokale, e cila përbën thelbin e problemeve në “komandimet” e kryera nga Arta Marku, sapo ajo mori detyrën, në fund të vitit 2017.
Këshilli i Lartë i Prokurorisë konstaton se, aktualisht, janë në fuqi rreth 27 caktime të përkohshme, një pjesë prej të cilëve në cilësinë e drejtuesit të përkohshëm të prokurorive.
Por, në vendimin e tij të parë për këtë çështje, KLP vendosi ndërprerjen e caktimit të përkohshëm vetëm për disa prokurorë të thjeshtë. Drejtuesit e përkohshëm të Prokurorive, të cilët qëndrojnë në detyrë me firmën e paligjshme të Arta Markut, ende nuk janë prekur nga KLP.
Krimet e Rënda
“Komandimi” më i zhurmshëm dhe më problematik i Arta Markut është ai i mikeshës së saj, Donika Prela. Për Prelën, Arta Marku shkeli dy herë rresht ligjin.
Fillimisht, e caktoi drejtuese të Prokurorisë së Durrësit, duke larguar në mënyrë anti-ligjore drejtuesin e emëruar të asaj strukture, Agron Gjana. Më tej, shkeli sërish ligjin, duke e caktuar në krye të Krimeve të Krimeve, duke larguar një tjetër drejtues të emëruar, Besim Hajdarmataj. Donika Prela
Donika Prela ka plotësuar “pritshmëritë” e Arta Markut. Nën drejtimin e saj, Prokuroria për Krime të Rënda sfumoi dhe mbuloi një seri hetimesh për zyrtarët e lartë të Partisë Socialiste, përfshirë dosjet “339” dhe “184”.
Prokuroria e Tiranës
Prej më shumë se një viti, prokuroria e kryeqytetit drejtohet nga Elisabeta Imeraj, një tjetër “komandim” i paligjshëm nga ana e Arta Markut. Imeraj u caktua si drejtuese në Prokurorinë e kryeqytetit pas largimit nga Vetingut të shefit të mëparshëm të përkohshëm, Dritan Rreshka.
Ligji parashikon që drejtuesi i Prokurorisë, përfshirë edhe të përkohshmin, të zgjidhet nga radhët e prokurorëve të të njëjtës strukturë. Por, Arta Marku vendosi që për prokurorinë e Tiranës të caktonte në drejtim Elisabeta Imerajn nga Krimet e Rënda.
Prokuroria e Durrësit
Në krye të Prokurorisë së Durrësit është Anita Jella, e caktuar përkohësisht pas largimit të Donika Prelës. Edhe në këtë rast, Kryeprokurorja e Përkohshme ka anashkaluar me vetëdije ligjin. Prokuroria e Durrësit, formalisht, ka një drejtues të emëruar-Agron Gjanën, i cili u largua pa bazë ligjore për t’i liruar vendin Donika Prelës.
Prokuroria e Elbasanit
Në krye të Prokurorisë së Elbasanit qëndron prej thuajse dy vitesh Enkelejda Millonai, e caktuar aty përkohësisht nga Arta Marku. Këshilli i Lartë i Prokurorisë nuk ka marrë asnjë vendim për zgjatjen apo ndërprerjen e mandatit të përkohshëm të Millonait, duke lënë në fuqi firmën 2-vjeçare të Arta Markut.
Prokuroria e Lezhës
Milan Laskaj ishte prokuror në Elbasan, kur Arta Marku, në mënyrë të paligjshme vendosi të largojë nga drejtimi i Prokurorisë së Lezhës drejtuesin e emëruar, Simon Pashuku. Laskaj qëndron prej mëse një viti në drejtimin e Lezhës.
