Nga Boldnews.al
Pas serisë së ministrave të telekomanduar, të cilët çdo 30 minuta mbushën paraditen e së Hënës me sulme për gazetarët që “shkaktuan panikun” e tërmetit, dita e parë e javës u mbyll me kërcënimin e Kryeprokurores së Përkohshme, Arta Marku, ndaj përgjegjësve të shqetësimit të qytetarëve.
Në një linjë me qeveritarët, Arta Marku lëshoi pasdite vonë të së Hënës një deklaratë, në të cilën kërkonte nga Prokuroria e Tiranës që të vlerësojë situatën nëse ka vepër penale dhe të mbajë të informuar institucionin qëndror të Akuzës për zhvillimet.
Njoftimi i zyrës së Arta Markut, përveçse kryekëput politik, është dëshmi e radhës për problematikat e theksuara me profesionalizimin të Kryeprokurores së Përkohshme.
Në “dy rreshta” njoftim, Arta Marku ka bërë dy gabime të rënda proceduriale;
Së pari, ajo kërkon nga Prokuroria kompetente (Prokuroria e Tiranës) që të vlerësojë situatën e “përhapjes së panikut” nga media.
Vlerësimi i një situatë nga prokuroria, për fakte publike, ose ndryshe “hetimi kryesisht”, ndodh në ato raste kur institucionet përgjegjëse nuk referojnë një situatë të dyshuar për kryerjen e veprave penale.
Ndoshta Arta Marku ka qenë në gjumë deri vonë mëngjesin e së Hënës dhe nuk është informuar se, gjatë mesnatës, uniforma policore mësynë në redaksinë e dy mediave on-line dhe shoqëruan gazetarët “e dyshuar që përhapën panikun”.
Pra, përtej ligjshmërisë ose jo të veprimeve të Policisë, ky institucion ka kryer një proces dhe rastin, sipas ligjit, do ta referojë në Prokurori. Ndaj, është teprim i madh nga ana e Kryeprokurores që të kërkojë “vlerësimin e situatës”, e cila shoqërohet me nisjen e një hetimi kryesisht nëse vlerësohet nga Prokuroria e Tiranës, kur, tashmë, Policia ka vepruar.
Së dyti, Kryeprokurorja e Përkohshme kërkon nga Prokuroria kompetente që, pas vlerësimit të situatës, të njoftojë institucionin qëndror të Akuzës për ecurinë e veprimeve.
Kjo kërkesë e Arta Markut është tërësisht anti-ligjore. Reforma në Drejtësi parashikoi që prokurorët janë të pavarur dhe ata japin llogari vetëm para gjykatës dhe jo eprorëve të tyre.
Në raste të veçanta, Prokurori i Përgjithshëm mund të informohet, në vija të përgjithshme për ecurinë e hetimeve, vetëm për ato çështje të cilat i ka përcjellë vetë në prokuroritë kompetente.
Në rastin konkret, informacionin për “gazetarët e panikut” e përcjell Policia e Shtetit në Prokurori. Ndaj, prokurori që do të marrë në dorë referimin e Policisë për gazetarët, si rregull, nuk duhet t’i japë aspak llogari Arta Markut dhe kujtdo tjetër.
Në fakt, është e qartë që edhe Arta Marku nuk ka asnjë interes që të dijë se si do të vijojnë procedurat për hetimin ose jo të “gazetarëve të panikut”.
Kryeprokurores së Përkohshme i duhej të dëshmonte vullnetin pro-qeveritar, vetëm dy ditë para se Këshilli i Lartë i Prokurorisë, i kontrolluar thuajse plotësisht nga maxhoranca socialiste, të miratojë renditjen e kandidaturave për Prokuror të Përgjithshëm me mandat të plotë 7-vjeçar.
