Nga Boldnews.al
U desh një rrebesh shiu, me intensitet mesatar për të përmbytur disa zona në Tiranë. Mungesa e pastrimit të kanaleve kulluese dhe investimi i mmunguar në kolektorë, bëri që kryeqyteti të përjetojë dy ankthe brenda katër ditësh. Së pari nga lëkundjet e forta të tërmetit të së shtunës dhe në vijim edhe përbytjet e natës së djeshme.
“Mirëmëngjes! Ka qenë 1 natë sfiduese për Tiranën me shi sa gjithë muajt e fundit bashkë. Në zonat informale me ndërtesa nën nivelin e kolektorëve kemi probleme me ujin. Bashkia Tiranë në gatishmëri! Si për tërmetet, do t’ia dalim edhe kësaj herë me shirat. Pa panik e me solidaritet”-shkruan kryebashkiaku Veliaj, që postimin e tij e shoqëron me çizme të veshura dhe pelerinë kundër shiut.
Kryeqyteti jeton në botën e çudirave, me frymë të zënë nga ndërtimet e pallateve dhe kullave, pa ujë të pijshëm nëpër çezma dhe i përmbytur nga uji i ndotur i shiut. Për një muaj pa shkëputje, më shumë se gjysma e Tiranës u tha për ujë të pijshëm. Megjithatë, ankesave të shumta të qytetarëve për mungesën e ujit, Bashkia Tiranë i është përgjigjur “pozitivisht” në një ditë të vetme, përmbytje masive.
Ndërsa Tirana vuajti dhe do të vuajë për ujë edhe në vijim, pasi që në mesditë kanë nisur kufizimet për shkak të turbullirave në rrjetin e ujisjellësit, ndodh që Drejtoria e Ujësjellës Kanalizimeve Tiranë, në kulmin e reagimit qytetar që ankohet me veten, por jo para bashkisë, të vendosë tarifë të shtuar në faturën e ujit.
“Në rast se ujëmatësi do të duhet të ndryshohet, atëherë konsumatori detyrohet për shpenzimet e furnizimit dhe të instalimit të ujëmatësit sipas faturës qe jepet nga Operatori”-thuhet në një dokument zyrtar të miratuar pak ditë më parë.
Ujë nuk ka, por grabitja do të vijojë. Pas rritjes së tarifës së ujit të pijshëm dy vite më parë, UKT, nën varësi të bashkisë së kryeqytetit, ka vendosur të kryejë “investime madhore” në ndryshimin e aparateve matës. Çështje tenderi, miliona euro, por më e rëndë në këtë situatë është se sahatët e ujit do të paguhen nga vetë abonentet, që do e kenë si “dhuratë” në muajin pasardhës, të afishuar në faturë.
Injorim, grabitje dhe përçmim më të madh se kaq nuk mund të kishte në këtë situatë. Qytetarët nuk kanë ujë, por pagesat do u shtohen. Me sytë nga çezmat që nuk sjellin pikën, qytetarët do detyrohet të detyrohen të rendin drejt dyqaneve për të blerë ujë me bidona, por më parë duhet të fusin këmbët në ujin e shiut që ka mbërritur deri në katet e para të banesave.
Kjo situatë pritet që të vijojë edhe ditën e sotme dhe aryseja është vetëm një: nuk janë kryer investime në kanale kulluese dhe mbi të gjitha kolektorët kryesorë nuk e përballojnë kapacitetin e prurjeve.
Sipas eskpertëve dhe studimeve të kryera, të cilat mbahen të fshehta në bashki, Tirana nuk e përballon më shumë se 20 minuta rrebeshin e shiut. Kjo për shkak se prurjet janë të furishme dhe nëntoka me tubacione të përmasave të vogla nuk ka forcat e tërheqjes së ujit. Disa investime që janë bërë më shtrim pllakash, cipë të hollë asfalti dhe vijëzime janë makiazh i një batërtie, pasi mungojnë ndërhyrjet në rrjetin e kullimit në nëntokë.
