Kreu i Grupit Parlamentar socialist, Taulant Balla, ka shmangur komentet mbi kushtet e reja që iu artikuluan Kryeministrit Edi Rama për hapjen e negociatave mes Shqipërisë dhe BE-së, gjatë vizitës në Berlin.
I pyetur lidhur me kushtin për dënimin e funksionarëve të korruptuar, Balla theksoi se funksionimi dhe ngritja e Prokurorisë Speciale Antikorrupsion, do të shoqërohet me një regjistër të personave të nivelit të lartë që duhen hetuar dhe gjykuar.
“Drejtësia duhet të funksionojë e pavarur nga politika. Ky ka qenë gur i themelit të funksionit të drejtësisë”, tha Balla, duke shmangur një përgjigje të drejtpërdrejtë, në një kohë kur dita ditës po shfaqen dokumente dhe video-përgjime, që provojnë skandalet e qeverisë Rama.
Deklaratat Balla i bëri pas një takimi me Sekretarin e Shtetit të Gjermanisë, Christian Lange. Ai pohoi se qeveria ka bërë disa herë përpjekje për të arritur një konsensus me PD sa i takon Reformës Zgjedhore.
“Dëshira jonë ka qenë gjithmonë, sipas traditës, që reforma zgjedhore të kryhet me dakordësinë e një spektri të gjerë të politikës shqiptare. Përsëri dua t’ju them se përpjekjet tona për të arritur konsensus me PD dot ë vijojnë. Gjatë javës që vjen do të kemi një komision me partitë, ku ato të shprehin qëndrimet e tyre”, tha ai.