Policia greke ka bllokuar një kamion me armë dhe municione, që dyshohet se kanë hyrë në Greqi nga Shqipëria.
Policia greke ka goditur një grup që ishte i angazhuar në trafikimin e armëve dhe municioneve, ndërsa janë arrestuar 16 persona.
Mediat greke raportojnë se 11 prej të ndaluarve janë grekë dhe 5 të huaj. Sipas policisë greke, ata ishin pjesë e një rrjeti kriminal.
Dyshimet janë se armët ishin importuar nga Shqipëria, ndërsa grupi përbëhej nga dy “bërthama”.
Sipas ELAS, grupi shqiptar përgjigjej për grumbullimin e armëve dhe municioneve, sipas porosisë, ndërsa një tjetër degë e grupit, ajo e Kretës, realizonte transportin.
Në momentin e bllokimit të kamionit, policia arrestoi drejtuesin 59-vjeçar dhe një pasagjer 54-vjeçar.
Hetimi policor tregoi se nga nëntori i vitit 2018 e deri më sot, ky grup kriminal kishte kryer katër importe të një numri municionesh të pacaktuar nga Shqipëria.
Mendohet se për importin e armëve nga Shqipëria përdoreshin shtigjet malore në dy anët e kufirit dhe grumbullimi i tyre bëhej në një nga pronat e personave të arrestuar.