Reforma zgjedhore dhe funksionimi në tërësi i sistemit të drejtësisë, paralajmërohen nga mediat gjermane, si parakushtet kryesore, që Bundestagu do i vendosë Shqipërisë për hapjen e negociatave.
Bundestagu do të votojë më 27 shtator lidhur me vendimin. Në një draft-vendim deputetë të CDU/CSU, që është grupimi më i madh në Bundestagun gjerman, kanë shprehur shqetësime përsa i takon lidhjeve të krimit me politikën, ndaj pritet të kërkohet që krahas luftës ndaj korrupsionit dhe krimit të organizuar, të ketë edhe një progres domethënës në të gjitha nivelet, dhe nëse vijon ndjekja penale ndaj gjykatësve dhe prokurorëve të dyshuar për lidhje me mafien.
Në draft-vendimin përfshihet 6 kushte që janë:
– Reformimi i Kodit Zgjedhor
– Funksionimi i sistemit të Drejtësisë
– Lufta kundër korrupsionit dhe krimit të organizuar
– Ndjekje penale ndaj gjyqtarëve e prokurorëve të dyshuar për lidhje me mafian
– Hetim lidhjeve të politikës me krimin
– Ulja e kërkesave për azil
Në një intervistë për DW, deputeti kristiandemokrat Gynter Krishbaum mbrojti idenë se Shqipëria dhe Maqedonia e Veriut duhet ta meritojnë hapjen e negociatave me BE-në në muajin tetor.
Sipas tij, politika e Shkupit shihet me sy më të mirë sesa Tirana.
“Ajo që mund të them unë është se në parlamentin gjerman, në Bundestag, mendimi për Maqedoninë Veriore është shumë i mirë, shumë pozitiv. Vendet duhet të vlerësohen sipas përparimeve që bëjnë vetë, mbi të ashtuquajturin “parimi i meritës”. Për mua është e qartë se mund të bëhet shkëputja e dy vendeve, e megjithatë në fund mund të ndodhë që bisedimet të fillojnë në të njëjtën kohë për të dyja vendet”, tha Krishbaum.
Veç Gjermanisë duket se Holanda dhe Franca mbeten kundërshtuese për hapjen e negociatave në 18 tetor me Shqipërinë dhe Maqedoninë e Veriut.
Malik Azmani dhe Karolin Nagtegal, dy europarlamentarë nga partia liberale “Për liri dhe demokraci” ngritën të enjten shqetësimin e emigracionit të parregullt të shqiptarëve në një kërkesë drejtuar Komisionit Europian.
Ata thanë se shumë shtetas shqiptarë tentojnë vazhdimisht të kalojnë ilegalisht drejt Mbretërisë së Bashkuar në shkelje të regjimit të lëvizjes së lirë.
