Avokati i njohur Ledio Braho u shpreh sot Komisioni i Venecias do të japë një opinion lidhur me atë nëse jemi në kushtet e shkeljes së Kushtetutës apo jo nga Presidenti lidhur me dekretin për anullimin e mbajtjes së zgjedhjeve vendore të 30 qershorit.
Braho tha se është kompetencë e Gjykatës Kushtetuese të shprehet lidhur me dekretet e Presidentit.
“Komisioni i Venecias jep një opinion, i cili nuk është detyrues për t’u marrë parasysh”, tha Braho.
Lidhur me Komisionin Hetimor për shkarkimin e Ilir Metës nga posti i Presidentit, Braho tha se ky komision ka marrë rolin e Gjykatës Kushtetuese.
“Për shkak të specifikës dhe për shkak të nivelit të ulët në njohuritë juridike të anëtarëve të komisionit hetimor, atëherë Kuvendi i është drejtuar Komisionit të Venecias për të dhënë një opinion.
Në fakt dekretet e Presidentit, edhe sipas raportit të OSBE/ODIHR mund të merren në shqyrtim dhe interpretohen vetëm nga Gjykata Kushtetuese.
Jemi në një situatë të paprecedentë, ku mungon Gjykata Kushtetuese dhe ajo e Lartë, Prokurori i Përkohshëm po merr mandatin e një Prokurori të Përgjithshëm jo të përkohshëm”, tha Braho.
Sipas tij, nëse Komisioni i Venecias do të thotë se kemi shkelje nga Presidenti, atëherë socialistët do të trumpetojnë në publik se edhe Venecia e tha që Kreu i Shtetit ka shkelur Kushtetutën.
“Nëse ndodh e kundërta, pra Venecia thotë se nuk ka shkelje, atëherë socialistët do të thonë se ky është thjesht një opinion. Mendoj se Komisioni ka vetëm një qëllim të godasë Presidentin dhe asgjë tjetër. Është një çështje politike, aspak juridike, pasi në fund të fundit, do të jetë sërisht Gjykata Kushtetuese që do të vendosë nëse duhet shkarkuar ose jo Presidenti”, tha Braho.
Avokati i njohur tha se Komisioni Hetimor flet për çdekretim, në një kohë kur Presidenti ka nxjerrë një dekret që anullon mbajtjen e zgjedhjeve lokale më 30 qershor.
“President ii është referuar marrëveshjes së Stabilizim-Asociimit, një vendimi të Gjykatës së Strasburgut, që kanë lidhje me pjesën e zgjedhjeve, për të cilat thuhet se s’mund të jetë një proces formal.
Kushtetuta e ka të parashikuar mandatin e të zgjedhurve vendorë, por nuk është aq i ngurtë sa në rastin e deputetëve apo zgjedhjen e Presidentit.
Në bazë të ligjit për qeverisjen vendore, pshteti vendor do të vijonte punën deri në realizimin e zgjedhjeve”, tha Braho.
