Një 30-vjeçar shqiptar u dënua me 2.6 vjet burg nga gjykata skoceze.
I riu pretendonte se ishte viktimë e trafikut të qënieve njerëzore, por versioni i paraqitur nuk ka bindur gjykatën e cila vendosi dënimin e tij.
Mediat vendase raportojnë se Mirjan Kastrati u arrestua në një fermë kanabisi brenda shtëpisë në qytetin Galashiels.
Para gjykatës 30-vjeçari tha se ishte viktimë e trafikimit dhe se po merrej me kultivim droge për të shlyer borxhin prej 16 mijë paundësh, shumë të cilën e kishte marrë borxh për të kaluar ilegalisht drejt Mbretërisë së Bashkuar.
Pas një kontrolli të ushtruar në muajin prill, policia gjeti në banesën e shqiptarit 700 rrënjë kanabis, vlera e të cilës arrinte deri në 200 mijë euro nëse do shitej në treg. Në momentin e kontrollit 30-vjeçari shqiptar po flinte në ambientet e kuzhinës. Prokurori Graham Fraser, solli në gjyq detaje të reja për sa i përket arsyeve se pse shqiptari synonte të shkonte në Britani të Madhe.
“I akuzuari tha se ishte arratisur nga Shqipëria përpara vitit 2018. Ai tregoi se si xhaxhai i tij, i cili ishte një person i rëndësishëm në politikë, ishte vrarë. Pas mesazheve kërcënuese për veten dhe familjen ai ishte detyruar të ikte nga Shqipëria. Ai po punonte për një grup që të shlyente borxhin”, tha Fraser.
