Matthew Palmer nuk rresht së dhëni mesazhe të këqia që kur ka filluar të merret seriozisht me Ballkanin. Përfaqësuesi Special i Shteteve të Bashkuara për Ballkanin Perëndimor ka dhënë një shembull të qartë se çfarë kupton ai me një demokraci të suksesshme. Gjatë një vizite në Mal të Zi ai e ka quajtur republikën e vogël ku mbretëron prej tre dekadash Gjukanoviçi si vendin më të suksesshëm multietnik të rajonit.
Palmer zhvilloi vizitën e parë zyrtare në rajon në postin e tij të ri ku u takua me Presidentin Milo Đukanović dhe Kryeministrin Duško Marković të Malit të Zi.
“Mali i Zi është një udhëheqës dhe vendi më i suksesshëm multi-etnik në rajon dhe nuk është rastësi që unë vendosa ta vizitoj së pari pasi mora përsipër këtë pozicion”, tha Palmer.
Që në kohën e prishjes së Jugosllavisë, vendi i vogël ballkanik, drejtohet nga një ish drejtor doganash të ciliët shumë vite italianët e kanë hetuar dhe ndjekur si kontrabandist cigaresh. Që prej asaj kohe Milo Gjukanoviç, sot president, ka qenë me radhë, kryetar shteti, kryetar i parisë më të madhe, kryeministër dhe ka mbajtur në dorë frenat e pushtetit politik dhe ekonomik në Podgoricë.
Është e vërtetë se ai ka veshur flamurin e properëndimorit dhe ka përballë një opozitë të fortë pro ruse, por kjo nuk është kurrsesi e mjaftueshme për ta vizatuar atë me nota pozitive siç bën Përfaqësuesi Special i Shteteve të Bashkuara për Ballkanin Perëndimor, Matthew Palmer.
