Nga Ilir Kalemaj
Kemi pafund specialistë futbolli dhe studio tv me velina sesa futbollistë dhe trajnerë të mirëfilltë.
Shumë tallava por pak muzikë të vërtetë.
Kemi më tepër dietologë se sa njerëz që mbajnë dietë.
Kemi më shumë gazetarë e reporterë sesa ngjarje.
Më tepër analistë se zhvillime politike.
Më tepër konstitucionalistë televizivë sesa nene Kushtetute.
Më shumë kafene se sa apartamente për banim.
Më tepër makina se sa km rrugë.
Më shumë qofteri se sa shkolla.
Më tepër pika karburantesh sesa fshatarë në zonat e braktisura rurale.
Më shumë azilantë hidrikë se azilantë politikë.
Më tepër grafomanë se libra që vlejnë.
Shumë më tepër llogje se punë.
Janë shtuar idiotët e dobishëm dhe tutkunët në masë ndërsa mungojnë profesionistët dhe menaxherët.
Na mbytën gjithologët por vuajmë për teknicienë.
Janë shtuar elifmatrakët por na mungojnë si uji i pakët diplomatët.
Shumë nitrat në fruta dhe perime por aspak dëshirë për llogari-dhënie.
Shumë ide por pak zbatueshmëri.
Llafollogji me shumicë dhe terapi në grup në cdo radhë bezdisëse por pak psikologë dhe me gishtat e dorës mjekët psikiatër në vend.
Shumë kritikë pa mendim në vend të mendimit kritik.
Shumë dogma por pak parime dhe aspak moral.
Shumë formë por pak substancë.
Tepër krekosje dhe ngrefosje por pak tru, djersë dhe mund.
Shumë kritikë ndaj politikës por politika konsumohet si askund tjetër në rruzull dhe politikanët adhurohen si star kinemaje.
Të gjithë flasin për lekë por pak dëgjon të flasin për cilësi jete.
Të gjithë duan të shkojnë por pak ata që duan vërtetë të punojnë.
Të gjithë ankohen por pak përpiqen për ndryshimin.
Të shumtë ata që qahen por pak protestojnë.
Pjesa më e madhe fladin për barazi, të paktë janë ata që realisht kërkojnë liri.
Pjesa më e madhe shohin traun te syri i tjetrit por aspak qimen te i tyri.
Kërkohet një shqiptar që të shohë punët e veta.
Ndjehuni të lirë ta plotësoni listën!
