Gjetja e jahtit në Portin e Shëngjinit dhe zhdukja e pronarit turk, 53-vjeccarit Sevgin Yavuz, mbetet ende një mister i madh.
Burime për Boldnews.al, bëjnë me dije se pas kontrolleve të bëra nga policia, rezulton se pronari turk ka qenë i vetëm në Jaht dhe pa pjesëtarë të tjerë të ekuipazhit.
Të njëjtat burime theksojnë se nuk janë gjetur shenja përleshjeje apo dhune, të cilat shtojnë edhe më tej misterin për zhdukjen e papritur të pronarit, i cili dyshohet se mund të ketë rënë në det dhe të jetë mbytur, si dhe mund të jetë rrëmbyer ose vrarë, dhe më pas i është zhdukur trupi.
Deri më tani edhe për vetë policinë e gjithë ngjarja mbetet një mister i madh, pasi përveç jahtit, nuk ka dëshmitar i cili mund të zbardh ngjarjen, apo të japë qoftë dhe një indicie të vogël se çfarë mund të ketë ndodhur me trupin e pronarit.
Deri tani ajo që dihet është se 53-vjeçari është biznesmen i famshëm në Turqi dhe ka qenë për pushime në Adriatik. Më parë ka qenë në Malin e Zi dhe kishte dalë me jaht nga porti i Tivarit.
Ndërkohë që më herët roja i portit të Shëngjinit, Nikoll Doda, tregoi për mediat se si peshkarexhat e kanë parë jahtin luksoz me motor të ndezur në det të hapur. Ai dyshon se jahti është braktisur, pasi pronari mund të jetë mbytur ose vrarë. Hetimet vazhdojnë./ Boldnews.al
