Kreu demokrat Lulzim Basha theksoi sot se raporti i OSBE/ODIHR rrëzoi farsën e Edi Ramës për 30 qershorin.
Basha theksoi se raporti tregoi se me Edi Ramën dhe këtë KQZ nuk mund të realizohen zgjedhje të lira dhe të ndershme.
Sipas kreut demokrat, OSBE/ODIHR tregoi se 30 qershori ishte një process anti-ligjor dhe anti-kushtetues.
“Siç konfirmon raporti, nuk ka ligj, nga Kushtetuta deri tek vetë rregulloret e KQZ-së që të ketë mbetur pa u shkelur.
Nuk ka institucion zgjedhor që nga KQZ tek numëruesit dhe vëzhguesit që nuk ka shkelur ligjin.
Së pari, raporti konfirmon se votimet e 30 qershorit ishin antikushtetuese dhe u mbajtën në shkelje të dekreteve të Presidentit.
Së dyti raporti konfirmon se votimet e 30 qershorit nuk ishin zgjedhje dhe nuk patën asnjë lidhje me të drejtën e popullit për të zgjedhur përfaqësuesit dhe drejtuesit e pushtetit vendor. Ato ishin një farsë zgjedhore dhe tallje demonstrative me pluralizmin politik dhe dhe demokracinë përfaqësuese.
Së treti, për të realizuar këtë farsë antikushtetuese dhe një partiake u shkelën ligjet dhe standardet zgjedhore. Në mënyrë të veçantë nga KQZ i cili portretizohet më shumë si organ partiak se sa si institucion i pavarur dhe i paanshëm kushtetues.
I vetmi aspekt normal që ka gjetur raporti është që socialistët nuk janë rrahur me njëri-tjetrin në qendrat e votimit bosh.
Pa hyrë në detaje dhe konstatime të qarta, dua të theksoj dy përfundimet kryesore të raportit:
1. Votimet e 30 qershorit ishin antikushtetuese, të paligjshme dhe të pandershme
2. Votimet e 30 qershorit ishin një farsë moniste dhe e përfaqësimit politik dhe shkatërrim i demokracisë”, theksoi Basha.
Në vijim ai shtoi se 30 qershori tregoi edhe një të vërtetë tjetër, as me këtë KQZ nuk mund të ketë zgjedhje të ndershme dhe të lira.
“E thashë në fillim dhe po e them prapë: Raporti i ODIHR është më shumë se raport zgjedhor. Ai nuk rrëzon vetëm votimet e 30 qershorit.
Raporti ka rrëzuar të gjithë shtetin e Edi Ramës.
Raporti nuk është vetëm autopsia e zgjedhjeve të vdekura të 30 qershorit.
Raporti është autopsia e kufomës së shtetit të së drejtës, e qeverisë së popullit dhe drejtësisë, të cilat janë vrarë nga Edi Rama për t’i zëvendësuar ato me një shtet privat, autokratik, kriminal dhe personal”, tha kreu demokrat.
