Plotësimi i strukturave të PD-së në ato degë ku ende nuk janë zgjedhur Sekretarët, Bordet Këshillimore dhe ato Financiare, ishin në qendër të takimit që kreu demokrat Lulzim Basha zhvilloi me të deleguarit e kësaj partie në qarqe.
Burime nga PD theksojnë se Basha ka kërkuar përmbylljen e procesit deri në 10 shtator, ndërsa paralajmëroi nisjen më 11 shtator të proceseve të reja organizative në partinë më të madhe të opozitës.
Jepini prioritet të rinjve dhe emrave me peshë, themeluesve dhe kontributorëve në PD, mësohet se ka qenë porosia e Bashës ndaj të deleguarve, që kanë raportuar lidhur me ecurinë e procesit organizativ në qarqet që mbulojnë, referuar edhe udhëzimit të muajit korrik.
Gjithashtu kreu demokrat ka kërkuar që në strukturat e PD-së të ofrohen emrat më me influencë në komunitet, dhe të intensifikohen takimet me qytetarët.
