Ngërçi në Gjykatën Kushtetuese i krijuar pas nisjes së Vettingu-t do të jetë pjesë e diskutimit të mbledhjes së KED që do të mbahet në ambientet e Gjykatës së Lartë këtë të martë.
Në listën e kandidatëve për Gjykatën Kushtetuese kandidatët vijnë nga gjyqësori dhe jashtë tij.
Për ata që nuk vijnë nga radhët e gjyqtarëve dhe prokurorëve, kontrolli kryhet nga Këshilli i Emërimeve në Drejtësi, i cili me marrjen e rezultateve të vettingut për gjyqtarët bënë edhe rënditjen e propozimeve më të mira.
Këshilli i Emërimeve në Drejtësi u ka dhënë mandat 8 relatorëve. Ata janë gjyqtarë dhe prokurorë që e kanë kaluar procesin e vettingut dhe në profesionalizmin e tyre varet saktesia e kontrollit të dosjeve për 18 kandiatët e Gjykatës Kushtetuese.
Kandidatët kushtetutes jo gjyqtarë kanë plotësuar një formular vetëdeklarimi për të shkuarën e tyre njerëzore, për të ardhurat dhe pronat që zotërojnë. Ndërsa kandidatët gjyqtarë janë në dorë të vettingut.
Me siguri dihet se nga 18 kandidatë, 10 vijnë nga gjyqësori, dhe 8 prej tyre e kanë kaluar procesin e vettingut.
Ndërkohë KED u ka bërë thirrje Kuvendit të Shqipërisë dhe institucionit të Presidentit të shpall njoftimin për kandidatët e mundshëm që do të caktohen prej tyre në Gjykatën Kushtetuese. Pra Kuvendi dhe Presidenti kanë të drejtë të ofrojnë nga një anëtarë të Gjykatës Kushtetuese.
Njoftimi i KED
Në zbatim të nenit 232 dhe 233 të ligjit nr. 115/2016, si edhe të pikave 32 dhe 34 të vendimit nr. 4 datë 11.03.2019 “Për procedurën e verifikimit të kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, Këshilli i Emërimeve në Drejtësi (KED), në datën 03.09.2019, ora 09.30, do të zhvillojë mbledhjen e radhës me këtë rend dite:
- Diskutimi dhe vendimmarrja në lidhje me rishikimin e vendimit nr. 116 datë 09.08.2019 “Për pezullimin e procedurës së verifikimit të kandidaturave dhe njoftimin e subjektit që e ka vënë në lëvizje, Presidentin e Republikës së Shqipërisë, për të vlerësuar rishpalljen e thirrjes për paraqitjen e kandidaturave për plotësimin e vendit vakant në Gjykatën Kushtetuese, vakancë e parakohshme, të shpallur me Dekretin nr. 10723 datë 07.02.2018 nga Presidenti i Republikës.
- Diskutimi dhe vendimmarrja lidhur me vijimin e procedurës së verifikimit të kandidates Zhaklina Peto për dy kandidimet e saj për vendet vakante në Gjykatën Kushtetuese.
