Çfarë pritet në shtator/Rilindja e nis punën me Metën, PD i rikthehet protestave…

Shtatori pritet të rikthejë protestat e opozitës kundër Kryeministrit Edi Rama, ndërsa ky i fundit në drejtimin e mazhorancës, pritet që të përqëndrojë vëmendjen në përplasjet e krijuara me Presidentin Ilir Meta.

Kuvendi pritet të nisë nga puna në sesionin e ri parlamentar më 2 shtator, ndërsa në agjendën e punës së tij, do të jenë 8 dekretet e Presidentit Meta, që kthen për rishqyrtim 8 ligje të miratuara nga mazhoranca socialiste.

Vjeshta e këtij viti parashikohet të jetë e ngarkuar, ku në njërën anë opozita do të rikthehet në aksionin e saj opozitar për largimin e qeverisë, ndërsa Rilindja krahas frontit të përballjes me opozitën, ka të hapur edhe atë me Presidentin e Republikës.

Një delegacion i nivelit të lartë ndërkombëtar, kryesisht nga Gjermania, pritet të ketë një vizitë në Tiranë, ndoshta në përpjekje për t’i dhënë zgjidhje krizës së thelluar politike në vend, ndërkohë që më 18 tetor, Shqipëria pret një përgjigje për hapjen ose jo të negociatave me BE-në.

Referuar deklaratave, kushteve politike, nivelit të korrupsionit dhe krimit të organizuar, shanset që Shqipëria të marrë një përgjigje politike janë pothuajse minimale, për të mos thënë se janë në nivelin zero.

Gjithsesi në rreth dy muaj, gjërat mund të ndryshojnë, nëse palët politike, arrijnë të gjejnë një marrëveshje për zgjidhjen e krizës dhe zhvillimin e zgjedhjeve të lira dhe të ndershme, sikundër kërkohet nga opozita.

Votimet e 30 qershorit, përveçse nuk njihen nga opozita dhe Presidenti, që i shpalli të pavlefshme me një dekret, duke vendosur mbajtjen e tyre më 13 tetor, pritet të mos marrin vlerësim pozitiv as nga OSBE/ODIHR, që do të publikojë raportin përfundimtar mbi zgjedhjet në fillim të muajit shtator.

LEXO EDHE  Faktet e reja për Mark Babanin/ Ja ç’thonë dokumentet autentikë të burgjeve italiane

Opozita ka deklaruar se do të rinisë protestat, por edhe takimet derë më derë me qytetarët, për të sqaruar alternativën e saj. Kreu demokrat Lulzim Bash aka publikuar një pjesë të konsiderueshme të programit të PD-së, veçanërisht atij që ka të bëjë me luftën kundër krimit, nxjerrjen e personave të inkriminuar nga zyrat e shtetit, dhe pastrimin e parave të drogës, përmes projekteve të ndërtimit.

Në anën tjetër, Rilindja pritet të aktivizojë komisionin hetimor ndaj Presidentit Ilir Meta, i cili përben hapin e parë në rrugën e gjatë të shkarkimit të tij nga posti i Kreut të Shtetit.

Përgjatë dy muajve të fundit, Presidenti i ka kthyer Parlamentit 8 ligje, që nisin me Akademinë e Shkencave, kontrata koncensionare për rrugën Orikum-Llogara”, kontrata koncesionare për ndërtimin e rrugës Milot-Balldren, ligjin për koncesionet dhe Partneritetin Publik Privat, ndryshimet në Kodin Penal, ligjin për zhvillimin dhe planifikimin e territorit, dispozita të cilat lidhen me praktika të ngjashme më me atë për ndërtimin e “Teatrit të ri”.

Pritet që për të gjitha ligjet e kthyera nga Presidenti, mazhoranca në Kuvend të rivotojë, pa marrë parasysh vërejtjet apo sugjerimet e Kreut të Shtetit. /Boldnews.al/