Nga Boldenws.al
Pak ditë pas shpërthimit të skandalit financiar në fondin “BESA”, po konstatohen tentativa mediatike për të shpërqëndruar fokusin prej skemën mashtruese, duke u marrë, në mënyrë të dyshimtë me emra periferikë, të cilët nuk rezultojnë të jenë pjesë operacionit të realizuar nga punonjëset e arrestuara të këtij institucioni jo-bankar.
Mediat e biznesmenit shqiptaro-italian, Carlo Bollino, i kanë dhënë një hapësirë të rëndësishme emrit të noteres Edlira Malaj, “gruaja e një gjyqtari të rëndësishëm në Tiranë”, e cila, sipas një shkrimi të “shqiptarja.com”, rezulton si “huadhënëse” një shume parash, me të cilat drejtoresha e filialit të “Besa”, Albana Imami, të mbulonte deficitet e krijuara nga skema piramidale.
Mediat e Bollinos i referohen materialit, të cilin e ka parë edhe “Boldnews.al”, mbi bazën e të cilit Prokuroria kërkoi në gjykatë për caktimin e masës së sigurisë për disa persona si të dyshuar për përfshirje në skemë.
Në materialin e hartuar nga prokurori Kolë Hysenaj, emri i noteres Edlira Malaj përmendet në dy episode. Në njërin, ajo, në cilësinë e noteres, ka përpiluar një kontratë huamarrjeje ndërmjet Albana Imamit dhe një biznesmeni, i cili i ka dhënë hua drejtueses së filialit të fondit “Besa”.
Në një episod të dytë, teksti i shkruar nga prokurori Hysenaj është i dobët dhe i pakuptueshëm për të arritur qartësisht në konkluzionin nëse Malaj ka qenë sërish në rolin e noteres apo huadhënëses. Gjithashtu, po në këtë moment, ndryshe nga të gjithë emrat e tjerë që rezultojnë huadhënës për Fondin, emri i noteres nuk lidhet me asnjë shumë monetare.
Pra, prokurori Hysenaj, në paqartësinë e tij, nuk ka dhënë asnjë lloj indicjeje konkrete për noteren Malaj. Materiali i Prokurorisë është i mjegullt në këtë pikë.
Por, jo aq për mediat e Bollinos, të cilët kanë vendosur që, jo vetëm ta përfshijnë, por edhe t’i japin një hapësirë të konsiderueshme emrit të noteres në një histori skemë mashtruese, për të cilën ajo nuk ka asnjë lidhje.
Siç duket, mediat e Bollinos e kanë përmendur emrin e saj për të dalë diku tjetër- tek “bashkëshorti i saj, gjyqtar i rëndësishëm në Tiranë”, një trajtim në formë “tërheqës” për publikun.
Këtë “mjet tërheqës”, pra përmendjen e gjyqtarëve apo prokurorëve, në grup ose me emra të përveçëm, e e ka përdorur shpesh kryeministri Edi Rama, për të tërhequr vëmendjen nga sikletet e tij pas zbulimeve periodike të abuzimit me pushtetin.
I njëjti model ndiqet, herë pas here, edhe nga media të caktuara, të cilat përfshijnë, edhe pa të drejtë, raste gjyqtarësh apo familjarësh të tyre, me shumë mundësi, për dy arsye-për tërheqje leximesh dhe për tërheqje vëmendjeje.
Mediat e Bollinos, me logon të pavarura, ndoshta edhe për zgjedhje editoriale, rezulton se janë treguar dashamirëse me qeveritarët, pikërisht në momente të sikelteshme të Edi Ramës, Erion Veliajt e të tjerë zyrtarë të maxhorancës.
Mediat e Bollinos kanë pasur një qasje mbrojtëse ndaj Erion Veliajt, kur opozita dhe një pjesë e rëndësishme e shoqërisë civile e konsideron kryebashkiakun e Tiranës si përgjegjësin kryesor për vdekjen e 17-vjeçarit Ardit Gjoklaj, në landfillin e Sharrës, në gushtin e vitit 2016.
Një qasje mbrojtëse u prezantua nga mediat e Bollinos edhe në rastin e Valdrin Pjetrit, e cila ndryshoi kursin vetëm kur Edi Rama “e shiti” kryebashkiakun e dalë nga votimet moniste të 30 Qershorit.
Një qëndrim shumë luftarak u mbajt për Mihalin, i cili, më së shumti ishte “kushëriri i Koço Kokëdhimës”. Por, mediat e Bollinos nuk “zbuluan” ose nuk iu duk interesant fakti që Mihali i “fast and furios së Porto Palermos” ishte, njëkohësisht, edhe djali i tezes së Petro Koçit, zv.ministrit të Mbrojtjes në qeverinë e Edi Ramës,
Tashmë që Edi Rama duhet të llogarisë edhe përballimin e sikleteve me “Kajmakun” e Vorës, mediat e Bollinos “gjetën” një mekanizëm për të lidhur skandalin e fondit “Besa” me “bashkëshorten e një gjyqtari të rëndësishëm”.
Deviza duket e qartë – Më mirë të merren me “gratë e gjyqtarëve” se sa me Kajmakun dhe “Kajmakët” e tjerë të “Rilindjes”
