Porti i Sarandës është skenë krimi

Nga Klodian Tomorri

Jahti 400 milionë dollarësh i Emirit të Katarit Tamim bin Hamad Al Thani, që u ankorua sot në Sarandë e ka kapacitetin e serbatorit 1.2 milionë litra karburant.

Për shkak të një politike absurde fiskale Shqipëria ja u shet karburantin jahteve me 0.58 dollarë për liter. Aq është sot. Arsyeja? Nafta e jahteve në Shqipëri nuk paguan akcize 350 lekë për litër, nuk paguan taksë qarkullimi 270 lekë për litër, nuk paguan tvsh 300 lekë për litër. Nuk paguan asnjë takse sepse konsiderohet rieksport.

Në Francë, çmimi i naftës për jahtet sot është 1.54 dollarë për liter sepse qeveria franceze i ka vënë taksë të posaçme karburantit të jahteve si mall luksi që janë. Dhe Saint Tropez është vendi ku ankorohen jahtet e pjesës dërrmuese të pasanikëve të botës.

Ne Itali, çmimi i naftës për jahtet sot është 1.72 dollarë për litër. Dhe Italia është një nga vendet më të vizituara nga jahtet e pasanikëve për shkak të plazheve fantastike që ka, veçanërisht Porta Cervo dhe Sardenja.

Morali? Me një të mbushur të jahtit, Shqipëria i fali sheikut multimialirder që erdhi sot disa orë në Sarande 704 mijë dollarë. Llogaria: 1.2 milionë litra x (1.54$-0.58$) = 704 mijë $.

LEXO EDHE  FOTO/ Veliaj si Enveri, ja si po i përdor fëmijët e kopshteve për arritjet e partisë...

Para 20 ditësh erdhi jahti i vëllait të këtij po në Sarandë. Mori 600 mijë litra karburant. 350 mijë dollarë të tjera të falura.

Nafta e ambulancës 1200 leke taksë për litër. Nafta e jahteve 0 lekë taksë për litër.

Unë nuk e di se ça emri mund t’i vësh tjetër kësaj politike, përveçse kriminale.

E dini sa janë përfitimet për turizmin nga kjo taksa? Zero. Përveç ndotjes së bregdetit nga jahtet që vijnë këtu dy orë sa të mbushen.

E dini pse bëhet gjithë kjo? Që të fitojnë lekë ca të babëzitur, të cilët i janë qepur Portit të Sarandës dhe ca agjenci turistike të zotëruara nga ca ish zyrtarë në konflikt të pastër interesi. Kjo është e pështirë. Neveri.

Por pjesa më e ndyrë është kur zarat e këtyre përfituesve, këta që lëpijnë ndonjë kockë, nisin e sulmojnë të gjithë ata që denoncojnë këtë padrejtësi.