Elona Caslli, një prej aktivisteve që mbrojnë Teatrin Kombëtar, ka publikuar në rrjet një pasazh nga romani “Heronjtë dhe Varret”, të shkrimtarit të njohur argjentinas me origjinë arbëreshe, Ernesto Sabato.
Aktivistja duket se ka zgjedhur këtë pasazh për të portretizuar kryeministrin Edi Rama.
“Tek ai nuk kishte asnjë lloj koherence, përjashto ato të fiksimeve të tij, që ishin të përpikta dhe të përhershme…”.
Postimi
“Shenjt i Ferrit
Për t’i rënë shkurt, ishte plotësisht e kundërta e asaj që quajmë njeri i ekuilibruar, ose thjesht e kundërta e asaj që konsiderohet njeri, nëse ajo që e dallon njeriun nga individi është një farë force, një farë këmbënguljeje dhe koherence idesh e ndjenjash, tek ai nuk kishte asnjë lloj koherence, përjashto ato të fiksimeve të tij, që ishin të përpikta dhe të përhershme.
Ishte krejtësisht e kundërta e filozofit, e njeriut që mendon dhe që ngre një sistem mendimesh, si një godinë harmonikë; ishte pak a shumë një lloj terroristi i ideve, një lloj antifilozofi. As fytyra e tij nuk i qëndronte besnike vetvetes. Ç’është e vërteta, gjithmonë kam menduar se brenda tij, ekzistonin disa persona të ndryshëm.
Edhe pse padyshim, ishte njeri i poshtër, do ta merrja guximin të pohoja se, megjithatë, tek ai kishte një lloj pastërtie, ndonëse ishte një pastërti e skëterrshme. Ishte një lloj shenjti i ferrit.
Shkëputur nga – Mbi Heronjtë dhe Varret – Ernesto Sabato”, është fragmenti që Caslli ja kushton Edi Ramës i cili është shoqëruar, edhe me një fotografi që “flet shumë”.
