Rivaldo, ish-lojtar i Barcelona dhe Deportivo, ndër të tjera, e bëri të qartë se nuk do ta shihte nënshkrimin e Neymar me Real Madridin si “një tradhti”: “Nëse nënshkruan me Realin nuk do ta shihja si tradhti, pasi u largua nga Barcelona për të firmosur me PSG dhe tani mund të fluturojë drejt Madridit. Kjo do të thotë se ai nuk po e lë drejtpërdrejt Barcelonën për të forcuar armikun e përjetshëm. Nuk është tradhti për mua”.
Sidoqoftë, dëshirat e Rivaldos nuk janë të njëjta me këtë skenar: “Nuk diskutohet, unë do të preferoja që Neymar të nënshkruante për Barcelonën. Vë bast që, nëse ka mundësinë të kthehet në një vend, ku ka qenë i lumtur dhe ku gjen shumicën e ish-shokëve të skuadrës, Neymar do të bëjë këtë zgjedhje. Por, sigurisht, kjo varet nga oferta e Barcelonës. PSG nuk do të pranojë një ofertë më të ulët nga Barcelona se ajo e Realit, vetëm sepse Neymar dëshiron të shkojë atje. Parizienët nuk duan të humbasin para dhe, padyshim, do të pranojnë ofertën më të mirë financiare”.
Megjithatë, që Neymar të kalojë në “Bernabeu”, nevojitet një “kurban” në Madrid, i cili është edhe ai brazilian. Fjala është për Vinicius, që mund të bëhet pjesë e operacionit, me destiancion kryeqytetin francez. Rivaldo nuk e sheh në këtë mënyrë: “Një lojtar i moshës së tij do të ishte i lumtur të mësonte nga Neymar apo Hazard. Ata mund ta ndihmojnë në karrierën e tij. Nuk ka kuptim të merrni në konsideratë largimin drejt një klubi tjetër për të luajtur më shpesh. Në vend të kësaj, ajo që duhet të bëni është të vazhdoni të punoni dhe mësoni çdo ditë, të prisni mundësinë tuaj për të provuar sa vleni”.