Një delegacion i Komisionit të Venecias do të zhvillojë një vizitë zyrtare në Tiranë në javën e dytë të shtatorit. Konfirmohet se vizita e delegacionit do të zhvillohet në datat 9-11 shtator, ndërsa takimet do të zhvillohen me Kreun e Shtetit, Ilir Meta, Kryetarin e Kuvendit dhe deputetë, por edhe në Kryeministri.
Delegacioni është një mision faktmbledhës, ku gjatë takimeve do të dëgjojë palët lidhur me situatën, dhe referuar raportit që do të hartohet, do të shprehet edhe qëndrimi i Komisionit të Venecias.
Vizita e delegacionit të Komisionit të Venecias ka në qendër të saj kërkesën që iu drejtua nga Parlamenti shqiptar për interpretimin e nismës për shkarkimin e Ilir Metës nga posti i Presidentit, me arsyetimin se ka shkelur Kushtetutën.
Mazhoranca e drejtuar nga Rama ndërmorri nismën për shkarkimin e Metës duke ngritur një komision hetimor parlamentar që drejtohet nga Ulsi Manja, pasi Kreu i Shtetit shpalli të pavlefshëm dekretin që përcaktonte 30 qershorin si ditën kur duhej të zhvilloheshin zgjedhjet lokale, duke caktuar një tjetër datë, 13 tetorin.
Në kushtet kur Gjykata Kushtetuese është jashtë funksionit, kushtetueshmëria e dekreteve të Presidentit nuk mund të interpretohet nga asnjë institucion tjetër, edhe pse në rastin konkret ishte KQZ, që përmes 4 anëtarëve socialistë, mori përsipër të bëjë interpretimet, duke trajtuar dekretin si një akt-administrativ.