Nga Boldnews.al
Ish-ministri i Jashtëm Ditmir Bushati, tashmë i përket atyre zërave mërmëritës që kanë nisur të artikulohen, qoftë edhe me diplomaci, kundër lidershipit të kryeministrit Edi Rama. Mënyrës së qeverisjes së tij, atoritarizmit të theksuar në parti dhe ekzekutiv, qorrsokakut ku ka futur vendin me koshiencë të plotë dhe mbi të gjitha pasigurinë për të nesërmen.
Në vazhdën e “batutave verore”, Ditmir Bushati ka thumbuar kryeministrin Rama duke sjellë në kujtesë tekstin e këngës së kantautorit Vlashent Sata: “Me jetu”… Bushati, shkruan në facebook se “Vlashenti është një mendje artistike që na fton të nisim me jetu, të bashkuar e me dinjitet, duke i dhënë fund rrethit vicioz të tranzicionit e fenomeneve negative të tij!”. Ndërsa jep edhe tekstin e këngës, që është mëse aktuale dhe jo rastësisht e përzgjedhur prej ish-ministrit të Jashtëm.
“Me jetu po du; Vendin tim me e gzu; E jo me bë pakt me djallin; Me mbijetu. Tash është kuptu tan marifeti; Nuk ka lind asnjë burrë shteti, që mendon më shumë për ne, sa mendon ai për veti…”.
Me këtë postim, Bushati duket se tërthorazi, thumbon ish-shefin e tij, kryeministrin Rama. Bushati u fye si për nga mënyra si e largoi Rama, ashtu edhe me personazhin aq grotesk që e zëvendësoi, me një ministër si Gent Caka. Hakmarrja e Ramës, nuk u ndal, duke e shkarkuar Bushatin si drejtues politik i qarkut Shkodër dhe aktualisht ka mbetur vetëm një deputet i thjesht, që mbush radhët në atë Parlament, po aq absurd, të kthyer në një qeshtore të madhe për kryeministrin tonë.
Statura e Bushatit jep një lloj shprese për të pasur zëra kritik brenda së majtës kundër lidershipit absolut Rama. Ai qe një nga shumë kokat e prera të dhjetorit të vitit të kaluar, por ndryshe nga ministrat e tjerë të shkarkuar, që ende janë gati të vetësakrifikohen për “Bablokun e madh”, Bushati tregoi të paktën një një rast kritik që doli kundër Ramës, kur ende ishte ministër.
Kjo lidhet me qëndrimet kundër ndarjes së Kosovës, në të ashtëqujturin “korrigjim kufinjsh”. Kredon politike e fitoi qoftë edhe me këtë gjest jo të vogël, pasi si fillim i prishi ëndrrën e çmendur kreut të qeverisë për tu vetëshpallur si “lider rajonal”, që vendoste “paqe në Ballkan”, pavërsisht se më vonë do sillte luftën pa kthim.
Rama nuk u mendua dy herë dhe bashkë me më shumë se gjysmën e kabinetit të tij shkarkoi edhe Bushatin, por ai krejt ndryshe nga kanakarët e tjerë të tipit Gjinuri apo Ahmetaj, nuk iu përul kreut të qevrisë.
Tashmë brenda PS-së po kërkohet më shumë cilësi se masivitet të zërave kritik. Padyshim që Bushati mbetet një prej atyre politikanëve që mund ta shkaktojë lëkundje të kryeministrit, por sërish do ketë nëvojën që përkrah të gjenden fillimisht ata pak socialistë të mbetur në parti, që numërohen me gishtat e njërës dorë. Ka edhe nga ata skeptikë, jo pa arsyetim të drejtë, që mendojnë se Bushati mund të dalë blof, njësoj si ish-Ministri i Brendshëm Fatmir Xhafaj, i cili në fillim u duk sikur po kurdiste një lëvizje ndryshe brenda PS-së, por me kalimin e kohës ra në heshtje të plotë, deri në venitje para “bablokut të madh”.
Edhe Bushati duket se është kujtuar mjaft vonë. Rama nuk u transformua sot, por i tillë ishte e për më shumë ka treguar më shumë se një herë se nuk mund të ndryshojë, pasi qeverisjen autoritare dhe mbi të gjitha spastrimin e zërave kritik e ka pasur me kohë. Socialistë si Fino, Majko, apo Xhafaj, mund të jenë si “Tre musketierë” plus “Dartanjani Ditmir”, por sërish e kanë të vështirë të ngrenë kauza të drejta morale, për aq kohë sa me “djallin Ramë” dikur qëndruan në një shishe…! Sa për Partinë Socialiste, ajo është “shitur” dhe bzan, duke u shkrirë nën ngjyrat e Rilindjes së Edi Ramës.
