Strategjia e Edi Ramës për Akademinë e Shkencave është një flluskë sapuni.
Kështu u shpreh akademiku Artan Fuga, duke iu drejtuar një forumi me pedagogë e kërkues shkencorë, ku paraqiti argumentet e tij lidhur me ligjin e paraqitur nga mazhoranca për Akademinë e Shkencave, që e konsideroi nul.
“Pyetja shumë e thjeshtë që ngrihet është çfarë na duhet ne kjo Akademi? Akademia duhet të jetë një vend që bën shkencën, por është një shërbim social me pensione për një grup njerëzish. Ne nuk duhet të vazhdojmë të mbajmë në këmbë këtë sherbim social, duhet ta rithemelojmë”, ka cituar Fuga, një deklaratë të Kryeministrit Edi Rama, dy vite më parë, ndërsa sot akademiku ngriti pyetjen: “Pse përfundoi si flluskë sapuni strategjia e Ramës?”.
“Dështoi reformimin e këtij institucioni të plakur, të mefshtë dhe pa produkt; Eshtë në kundërshtim më Kushtetutën e Shqipërisë, Kodin e punës, Ligjin për arsimin e lartë, etj.; Degradon dhe e poshtëron tërësinë e universiteteve shqiptare dhe bjerr edhe më tepër statusin socioprofesional të pedagogut shqiptar, si dhe jep shembullin sesi dija dhe shkenca kombëtare vihen nën autoritetin autoritar të një burokracie autoritare pa asnjë lidhje me shkencën.
Shkelja e Kushtetutës është hakmarrja që ka ndërmarrë Akademia e Shkencave ndaj Presidentit të Republikës. Emërimi nga presidenti është një mbrojtje që i jepet autonomisë së universiteteve dhe akademisë. Në Kushtetutë thuhet se emërimin e dekanëve të universiteteve dhe kryetarin e Akademisëe miraton Presidenti i Republikës.
Por, sipas ligjit të ri neni 11 pika 6, thuhet se ‘presidenti mund të mos e emërojë kryetarin e Akademisë, por nëse shumica e anëtarëve të Asamblesë së Akademisë nuk është dakord me presidentin dekreti i tij bie. A ka ndonjë jurist në Shqipëri, apo kanë vdekur të gjithë? Si mundet që një asamble akademikësh të rrëzojë atributin qëpresidentit ia jep vetë Kushtetuta?”, u shpreh Fuga.
Sipas tij, kjo pikë e ligjit është një hakmarrje e dobët e deputetëve të mazhorancës ndaj kreut të shtetit, i cili rrëzoi emërimin e Skënder Gjinushit në krye të Akademisëduke e argumentuar si antiligjor zgjedhjen e tij.
“Neni 82 i Kushtetutës parashikon që ligjet të përligjin shpenzimet financiare, por ligji për Akademinë nuk ka relacion financiar”, u shpreh Fuga.
Po përveç Kushtetutës ky ligj, sipas Fugës, bie ndesh edhe me ligjin në fuqi për Arsimin e Lartë, ku shprehimisht thuhet se kuadrin ligjor në fushën e arsimit dhe kërkimit shkencor e inicion vetëm ministria e Arsimit. Por çfarë ndodhi me këtë ligj? Ministria e mbajti procesin e hartimit dhe konsultimit 2 vite dhe krejt papritur një grup deputetësh dërgojnë këtë draft ligjor në Kuvend duke e tejkaluar këtë kopetencë që i përket ministrisë me ligj.
Gjithashtu Fuga argumentoi dhe disa pika të këtij ligji për organizimin e akademisë që bien ndesh me ligjin e Arsimit të Lartë.
“Titujt akademik dhe akademik i asociaur përfitojnë shpërblim të përhershëm, pra të përjetshëm. Nga kjo pikpamje akademiku nuk del kurrë në pension. Edhe kur kalon moshën 75 vjeçare ai vazhdon me të njëjtën trajnim. Ku mbështetet ky priviligjim?”, tha Fuga.
