Konstituohet Këshilli i ri Bashkiak i Tiranës, i cili do të drejtohet nga Toni Gogu.
Pas zyrtarizimit të rezultatit për votimet e 30 qershorit, hapi i dytë i hedhur nga Rilindja është konstituimi i këshillave bashkiakë, që pasohen nga betimet e kryebashkiakëve.
Toni Gogu zëvendësoi në këtë pozicion Aldrin Dalipin, që drejtoi këshillin bashkiak gjatë mandatit të parë të Erjon Veliajt si kryebashkiak i Tiranës.
Gogu ka mbajtur pozicionin e zv.ministrit të Drejtësisë, ndërsa tashmë do të drejtojë këshillin bashkiak të dalë nga votimet e 30 qershorit.
Nuk dihen arsyet sepse Rilindja nuk rikonfirmoi në detyrë sërisht Aldrin Dalipin.
“Duke mbështetur maksimalisht propozimin e drejtuesit të grupit të Partisë Socialiste, për kandidaturën e zotit Toni Gogu, si kryetar i ri i këshillit të bashkisë së Tiranës, më lejoni të vlerësoj se zoti Gogu përcjell cilësi shumë të mira qytetare dhe profesionale për këtë detyrë.
Me një eksperiencë shumë të vlerësueshme për nga përkushtimi dhe korrektesa, ai ka drejtuar një organizatë të rëndësishme ndërkombëtare si Word Vizion për Shqipërinë dhe Kosovën. Po kaq pozitive do të vlerësoja edhe punën e tij në sistemin e drejtësisë, duke lënë gjurmë të posaçme gjatë veprimtarisë së tij deri në detyrën e zv. ministrit të drejtësisë së fundmi”, u shpreh Dalipi.
Gogu, ka qenë edhe pastor protestant, madje është ai që ka kurorëzuar në martesë, Erjon Veliajn.
