“Sot ka një prani të shtuar të forcave të policisë përreth Teatrit”. Deklarata bëhet nga Aleanca për Mbrojtjen e Teatrit Kombëtar, përmes një njoftimi në rrjetet sociale. Aleanca u bën apel qytetarëve që të bashkohen pranë teatrit për ta ruajtur nga shembja gjatë natës.
Në një video të publikuar nga Aleanca evidentohet disa efektivë policie pranë teatrit dhe një makinë policie e parkuar aty.
Nga Aleanca bëhet e ditur se në rast se do ketë një tentativë për shembjen e teatrit, ata janë në gatishmëri për gjithçka që mund të ndodhë.
Një ditë më parë, në sallën e Teatrit Kombëtar u dha shfaqja-protestë “Marr guximin”, një monodramë e rivënë në skenë nga aktori Mehdi Malka. Aktiviteti shënoi rihapjen e Teatrit Kombëtar një vit pasi qeveria vendosi për shembjen e godinës dhe tjetërsimin e truallit përreth në kulla shumëkatëshe dhe një teatër të ri. Shfaqet janë planifikuar të vijojnë përgjatë gjithë gushtit dhe një ndër aktorët që pritet të performojë është edhe Mikele Plaçido, bëhet e ditur nga Aleanca. /BN/
