Ish-Presidenti Bujar Nishani e ka cilësuar sjelljen e Kryeministrit Edi Rama ndaj artistëve lidhur me Teatrin Kombëtar të njëjtë me atë ndaj studentëve, në revoltën e fundit studentore të pak muajve më parë.
Nishani shkruan se sjellja e Ramës është mafioze, ndërsa akuzon Kryeministrin se po tenton të përçajë artistët.
“Artistët e duan, e kanë kërkuar, e mbështesin dhe e meritojnë Teatrin e ri, në respekt të pacënuar të trashëgimisë së tij historike e arkitekturore siç i rezistoi edhe diktaturës”, shkruan Nishani.
Postimi i Bujar Nishanit
Loja e pushtetit monist e më okulti në 30 vitet e fundit, me artistët për ti përçarë, e njëjtë me sjelljen mafioze të tij ndaj revoltës së fundit studentore.
Artistët e duan, e kanë kërkuar, e mbështesin dhe e meritojnë Teatrin e ri, në respekt të pacënuar të trashëgimisë së tij historike e arkitekturore siç i rezistoi edhe diktaturës.
Por, të gjithë ata janë kundër vjedhjes së pronës së kulturës sonë, të gjithë ata janë kundër simbiozës pushtet/mafia mbi të drejtën, pronën shtetërore, trashëgiminë kulturore, dinjitetin, ligjin, të drejtën e një shoqërie të tërë.
Korrupsioni mafioz dhe përdhosja e dinjitetit të shumicës dërrmuese të shoqërisë nuk mund të fshihet më pas maskave të propagandës komsomolase që rilindi për fat të keq ndër ne, por që po shuhet me shpejtësi, për fat të mirë, prej nesh.
Vetëdijen humane nuk mund ta blej dot askush !
