Situata te Teatri Kombëtar duket se është qetësuar disi, pas tërheqjes së forcave policore nga rrethimi i godinës mbrëmjen e djeshme. Megjithatë, mendon kryebashkiaku i Tiranës Erion Veliaj, për ti hedhur benzinë zjarrit.
Nga Denveri i SHBA ku ka qenë i ftuar në një konferencë, siç bën me dije zyra e shtypit e kryebashkiakut, Veliaj e ka quajtur minorancë pjesën e qytetarëve që janë kundër shembjes së Teatrit.
Të njëjtin përcaktim përdori edhe për Unazën e re, ku prej muajsh banorët protestojnë kundër projektit që parashikon shembjen e banesave të tyre. Projekt, për të cilin në fakt ka nisur një hetim për shkak të parregullsive ligjore të një prej firmave që fitoi tenderin për rikonstruktimin e një prej tre lotëve, si në Shqipëri, ashtu dhe në SHBA.
“Në Tiranë, ndryshimi do të vijë edhe për çështje shumë të debatueshme, si zgjatimi i Lanës, Unaza e Madhe, Teatri i Ri Kombëtar, por janë ndryshime absolutisht të nevojshme dhe të pakontestueshme. Pra, nuk mundet që qyteti të mbahet peng prej disa minorancave që do ekzistojnë gjithmonë, dhe gjithmonë nuk do të bien dakord”, citohet Veliaj në njoftimin e shpërndarë nga zyra e shtypit e Bashkisë Tiranë.
Ligji për shembjen e Teatrit Kombëtar, i miratuar me votat e mazhorancës në Kuvend, është mbështetur që në krye të herës nga kryetari i Bashkisë Tiranë, Erion Veliaj. Ndërkohë, që opozita ka shprehur qëndrim kundra duke iu bashkuar protestës së artistëve dhe qytetarëve që kundërshtoreje shembjen e godinës. Ndër të tjera, ka akuzuar se ligji i miratuar prej socialistëve, ka si qëllim edhe pastrimin e parave të pista, përmes koncesionarit, kompanisë Fusha SH.P.K.. Akuza ka pasur gjithashtu se si në rastin e Unazës së Re, tenderi ka qenë korruptiv në mënyrë që fituese të dilte pikërisht kompania në fjalë, një ndër të preferuarat në fakt e kryebashkiakut Veliaj, kur bëhet fjalë për kontraktimin në realizimin e punëve publike.
Edhe nga Presidenca është mbajtur një qëndrim kritik ndaj ligjit. Dje, Presidenti Ilir Meta dorëzoi pranë gjykatës Kushtetuese kërkesën për shpalljen antikushtetuese të ligjit për shembjen e Teatrit Kombëtar, edhe pse Gjykata Kushtetuese është tërësisht jashtë funksionit të saj dhe prej 16-muajsh. /BN/
