Nuk zgjati shumë frymëmarrja që i dhanë këto ditë të freskëta Europës së munduar nga një valë e pazakontë të nxehti për qershorin.
Termometri do të rritet sërish në kontinentin e vjetër, përfshirë dhe Ballkanin, ku temperaturat e larta do të rikthehen, ashtu si dhe në pjesën tjetër të Europës.
Më e rrezikuar duket se është sërish Franca, që po shkon drejt një vale të dytë përvëlimi. Afshi i nxehtë do të nisë të ndihet atje që nga fundjava dhe deri të paktën, shumica e vendit pritet të përfshihet nga temperature që kapërcejnë 35 gradët Celsius.
Nga sa paralajmëron “MeteoFrance”, e mërkura dhe enjtja e javës së ardhshme do të shënojnë pikun e vapës në këtë vend, me termometrin që pritet të tregojë 39 deri në 40 gradë Celsius.
Franca megjithatë nuk do të jetë e vetmja që do të bëjë llogaritë me të nxehtin përvëlues: javën e ardhshme, me një vapë mbytëse pritet të përballen edhe Gjermania, Austria, Mbretëria e Bashkuar, Norvegjia, Holanda, Spanja e Portugalia.
Në fund të qershorit, temperature ekstremisht të larta për atë muaj u regjistruan në disa pjesë të Europës duke nisur nga Franca që shënoi 45 grade Celsius, e ketë tendencë sipas sinoptikanëve, duket se do të ndjekë dhe korriku.
Ekspertët madje paralajmërojnë se i nxehti i madh ka shumë gjasë të vazhdojë përgjatë gjithë verës. I nxehti rekord në Europë dhe zona të tjera të hemisferës veriore, përfshirë disa pjesë të Amerikës së Veriut dhe Azisë, i detyrohet asaj që ata e quajnë rezonance e valeve planetare, që prodhon një mot të pazakontë në pjesë të ndryshme të globit, e që favorizohet sipas gjasave, nga ndryshimet klimatike të shkaktuara prej aktivitetit njerëzor.
