Një ngjarje e rëndë u denoncua ditën e sotme nga qytetarët, ku një person ka humbur jetën në Postën e Fierit dhe pavarësisht se u njoftuan shërbimet e ambulancës ato mbërritën 30 minuta me vonesë në vendngjarje.
Lidhur me këtë ngjarje të rëndë, ka ardhur dhe reagimi i Spitalit të Fierit, i cili deklaron se vdekja e shtetasit N.RR ka ardhur për shkaqe natyrale, dhe se ambulanca ka mbërritur në vendngjarje vetëm pak minuta pasi ka marrë thirrjen.
Ja njoftimi i Spitalit së Fierit:
Nisur nga rasti i publikuar në rrjete sociale lidhur me një vonesë të pretenduar të autoambulancës për ti dhënë ndihmën një pacienti, Spitali Rajonal Fier sqaron se:
Sapo është marrë thirrja me anë të një telefonate në numrin e 127 në orën 11:54, një autoambulancë me mjekë dhe infermierë është nisur menjëherë, vetëm 1 minutë pas njoftimit, dhe ka mbërritur pranë vendit ku ndodhej i moshuari në orën 12:02.
Menjëherë pacienti N. RR është transportuar në Spitalin Rajonal Fier, në prani edhe të forcave të policisë. Në orën 12:20 është konfirmuar mbas ndërhyrjeve reanimatore nga reanimatori diagnoza Ekzitus.
Një fakt i tillë konfirmohet edhe nga Qendra Kombëtare e Urgjencës Mjekësore, e cila bën me dije gjithashtu se të gjitha thirrjet për ndihmë janë të rregjistruara në sistem, të cilave u përgjigjen në kohë nëpërmjet flotës së zgjeruar me autoambulanca duke bërë të mundur dhe shkurtimin e kohës së mbërritjes në destinacion.
