Meta i refuzoi postin/ Gjinushi vetshpallet kryetar

Presidenti Ilir Meta refuzoi zgjedhjen e Skënder Gjinushit në krye të Akademisë së Shkencave, megjithatë “Sasha” duket se ka zgjedhur të vetëshpallet kryetar…

Në faqen zyrtare të Akademisë së Shkencave, rezulton se kryetari i akademisë është pikërisht Skënder Gjinushi.

Dekreti i Metës – Presidenti Ilir Meta dekretoi më 12 Korrik refuzimin e emërimit të Skënder Gjinushit si kryetar i Akademisë së Shkencave. “Rezulton se procesi zgjedhor i zhvilluar në datën 24.05.2019 në Akademinë e Shkencave, për zgjedhjen e Kryetarit të Akademisë së Shkencave, paraqet problematikë të theksuar ligjore. Kjo gjendje paligjshmërie e bën të pamundur që Presidenti i Republikës të ushtrojë kompetencën e tij të parashikuar në nenin 92/g të Kushtetutës, për të emëruar Kryetarin e Akademisë së Shkencave”, theksohet në dekret.

Në arsyet e numëruara për mos dekretimin e Gjinushit në krye të akademisë, kreu i Shtetit, përmend episodet sipas tij problematike: që nga zgjedhja me një kandidature të vetme, e deri tek mbajtja e postit të kreut të Partisë Socialdemokrate pa ndërprerje, deri ditën e realizimit të procesit zgjedhor për Kryetar të Akademisë së Shkencave.

LEXO EDHE  Vrasja makabre në Gjirokastër, nis gjyqi ndaj Apostol Kostës/ Detajet

Reagimi – Skëndër Gjinushim nuk e ka pritur mirë refuzimin e Presidentit për ta emëruar në krye të këtij institucioni. Gjinushi është shprehur se Presidenti nuk është komision hetimor që të mos dekretojë zgjedhjen e tij dhe sipas tij, kreu i shtetit nuk ka të drejtë të refuzojë dekretimin.

“Votimi farsë” – Skënder Gjinushi u zgjodh kryetari i ri i Akademisë së Shkencave me 35 vota në një garë pa rivalë. Në total votuan 43 akademikë. Akademiku Artan Fuga, një zë i fuqishëm i opinionit publik, dhe opozita, i cilësuan zgjedhjet farsë. /BN/