Gent Ibrahimi, kreu i KLP, në një deklaratë për mediat pas përfundimit të intervistimit të katër kandidatëve të parë për njësinë antikorrupsion, e konsideroi procesin shumë të rëndësishëm, ndërsa shtoi se kishte frikën e kthimit të tij nga e para për shkak të Vettingu-t. Seanca e intervistimit të katër kandidatëve të parë u zhvillua me dyer të mbyllura dhe kjo ishte një nga shqetësimet e ngritura nga gazetarët në dalje të Ibrahimit para tyre.
Ibrahimi e konsideroi një proces administrativ të cilin KLP është duke e zhvilluar me dyer të mbyllura.
Sipas Gent Ibrahimit, seancën me dyer të hapura apo të mbyllura ai e shpjegon në këtë mënyrë: “Është proces i brendshëm dhe intervistat janë regjistruar në audio dhe video dhe ata mund të bëjnë ankim. Është ruajtur konfindencialiteti i çdo kandidati”.
“KLP e ka treguar me fakte se ne jemi të priur të jemi të hapur dhe do u lutesha të mos na keqkuptoni sot. Në këtë pjesë ne iu dedikuam shqyrtimit të dokumentetve. Diskutuam gjetjet paraprake të komisionit. Nuk ishte një mbledhje formale dhe kur ne të kemi gati projekt- aktet dhe relacionet këto do diskutohen në një mbledhje formale”, tha ai.
Por ajo për të cilën edhe vetë kreu i KPL ishte tepër i shqetësuar është fakti se nga katër kandidatët e parë vetëm njëri prej tyre e ka kaluar procesin e Vettingut. Tre të tjerë nuk kanë dalë ende para KPK-së dhe kjo është një rrezik për kthimin edhe një herë nga fillimi i përzgjedhjes së kandidatëve për SPAK.
“Nga 4 kandidat vetëm 1 e ka kaluar Vettingun. Për fat të keq mund të rrezikohet procesi i SPAK. Pasi ky proces synon të vlerësojë profesionalizimin ndërsa KPK integritetin e tyre.
Kam besimin që në përgjithësi që këto dy procese do sjellin një proces të njëjtë. Megjithatë nuk përjashtojmë as mundësinë e pasjes së një rezultati të kundërt”, tha Ibrahimi.
Në procesin e përzgjedhjes së kandidatëve për SPAK janë të pranishëm edhe ndërkombëtarët.
Për Ibrahimin prania e tyre është e domosdoshme, pavarësisht se nuk kanë të drejtë për dhënien e pikëve.
KLP “xhiron bosh”/ “Do të zgjedhim SPAK-un”, por kandidatët janë në Veting
