Një konflikt mes dy grupesh ka sjellë vrasjen e një personi dhe plagosjen e 5 të tjerëve në Kavajë, këtë të enjte. Një nga pistat e grupit hetimor lidhur me ngjarjen, në këtë fazë të hetimeve paraprake, janë pazaret për trafikun e drogës.
Dy takimet – Para se te ndodhte ngjarja, një nga vëllezërit Aliu është konfliktuar me pjesëtarë të grupit tjetër më herët gjatë orëve të paradites, thanë burime pranë grupit hetimor. Një takim i dytë mes palëve në një lokal rreth orës 12:30 në lagjen nr. 2 Kavajë ka degjeneruar në të shtëna me armë zjarri, që solli edhe një viktimë, Ramazan Hasalliu 50 vjeç, kalimtar në rrugë. Pesë persona u plagën, mes tyre edhe nga personat i përshirë në konflikt, Marius Aliu. Ndërsa katër të tjerët, ishin kalimtarë dhe persona të cilët në lokal.
Të përfshirët në koflikt – Rustem Dedej, dhe vëllezërit Elio e Erald Hykaj, të cilët u përplasën me vëllezërit Marius dhe Denis Aliun, janë shpallur në kërkim policor. Në kërkim policor është edhe Denis Aliu.
“Sot rreth orës 12:30 në lagjen nr. 2 Kavajë, pas një konflikti mes disa personave, ka mbetur i vrarë shtetasi Ramazan Hasalliu, (kalimtar i rastit) dhe kanë mbetur të plagosur 5 shtetas, të cilët po marrin mjekim në spitalin e Durrësit, jashtë rrezikut për jetën. Nga veprimet paraprake dyshohet se autorët e ngjarjes janë dy vëllezër, Marius Aliu dhe Denis Aliu. Marius Aliu autori i dyshuar, mbahet në ruajtje nga shërbimet e Policisë në spitalin e Durrësit, pasi është i plagosur. Policia është vënë në ndjekje të autorit tjetër, Denis Aliu dhe vijon krehja e zonës për kapjen e tij. Policia ka bllokuar dy automjete që u përkasin pjesëtarëve të palëve që janë konfliktuar. Janë shoqëruar në Komisariatin e Policisë Kavajë disa persona dhe vijon puna për shoqërimin e personave të tjerë”, njoftoi zyrtarisht policia.
Hetimet – Një nga pistat më të mundshme të konfliktit mes dy grupeve dyshohet të jenë pazaret e drogës. Personat e përfshirë në konflikt kanë jetuar jashtë vendit dhe dyshohet se kanë qenë të përfshirë në trafikun e drogës, thanë burime pranë grupit hetimor. Pikërisht pazaret e drogës mendohet të jetë një nga pistat që kanë sjellë përplasje mes dy grupeve. Megjithatë, kjo pritet të verifikohet, pasi hetimet janë ende në fazën paraprake.
Dëshmitarët – Kalimtarë të rastit janë shprehur të shokuar me ngjarjen në fjalë, pasi tregojnë se personat në konflikt kanë qëlluar në mënyrë të pakontrolluar, sa që plumbat kanë kapur edhe automjete që janë disa dhjetëra metra larg vendit të ngjarjes. Sipas dëshmitarëve, është fat që kjo ngjarje nuk shënoi më tepër viktima, jo vetëm mes palëve të përfshira në konflikt, por edhe mes kalimtarëve të rastit, pasi zona është e populluar.
/Boldnews.al/
