Gazetari Neritan Sejamini përmes një postimi në rrjet ka ngritur dyshimet e tij lidhur me qëndrimin që po shfaqin ambasada e SHBA dhe ajo e BE-së në Tiranë për ngritjen e Gjykatës Kushtetuese.
Sejamini shkruan se “Ambasada amerikane dhe ajo e BE-së kanë filluar, në mënyrë të koordinuar, të përdorin shprehjen pa kuptim “veting rigoroz” për kandidatët e Gjykatës Kushtetuese”.
“Kushtetuta e përcakton qartë se kandidatët duhet të kenë kaluar me sukses vetingun, që ligji e përcakton se do të thotë që duhet të kenë kaluar të dyja shkallët e vetingut.
Kam një parandjenjë se kjo fjala “rigoroz”, e cila nuk figuron as në Kushtetutë e as në ndonjë ligj, është një shpikje e qëllimshme që nesër të na thonë se vetingu në shkallën e parë është bërë aq mirë, pra “rigorozisht”, sa mund t’i zgjedhim anëtarët e GJK-së pa pritur vendimin e shkallës së dytë të vetingut, pra në kundërshtim me Kushtetutën.
Do e marrim vesh këto ditë nëse do guxojnë vërtet të propozojnë zgjidhje antikushtetuese”, thekson Sejamini.
Të dy selitë diplomatike në Tiranë janë shprehur se përplasja e krijuar pas dekretit të Presidentit që anullonte zgjedhjet e 30 qershorit dhe caktimin e një date tjetër, atë të 13 tetorit, duhet të zgjidhen në Gjykatën Kushtetuese. Kjo e fundit është jashtë funksionit, ndërsa nga diplomatët është kërkuar ngritja e saj sa më shpejt.
