Për herë të parë në 29 vitet e tranzicionit politik, në Shqipëri po mbahet një proces votimi i ngjashëm me ato të zhvilluara në kohën e diktaturës.
Procesi është cilësuar si anti-ligjor nga Presidenti i republikës, opozita, por edhe konstitucionalistë, ndërsa emra të njohur të fushave të ndryshme i kanë drejtuar një apel shqiptarëve që të refuzojnë dhe bojkotojnë votimet moniste.
Gjithsesi kjo nuk e ka ndalur kryeministrin Edi Rama që t’i shkojë deri në fund procesit, madje duke shkaktuar edhe përplasje të forta në disa zona.
Qytetarët kanë protestuar në disa prej bashkive në mbështetje të dekretit të Presidentit që anulonte zgjedhjet, por policia, përfshi edhe forcat special RENEA dhe FNSH kanë përdorur dhunë në disa prej tubimeve.
Gjatë ditës së djeshme, militantë të PS-së, të mbështetur nga policia kanë marrë nën kontroll objektet shkollore, që ishin përcaktuar si qendra votimi, por nga bashkitë që drejtohen nga opozita, e cila nuk i njeh zgjedhjet, u kërkua respektimi i dekretit.
Pritet që në këto votime të ketë një pjesëmarrje të ulët, dhe duket se kjo do të jetë edhe sfida e Rilindjes.
Në mungesën e kandidatëve seriozë alternativë, PS pritet të ketë drejtimin e 61 njësive bashkiake, ndërsa vëmendja e Rilindjes është përqëndruar në pjesëmarrjen sa më të lartë, duke kërkuar me detyrim nga administrata që të marrë pjesë në votim, por jo vetëm kaq, duke kërkuar që përveç familjarëve të tyre, të ofrojnë në votime edhe 3-4 persona të tjerë.
Në të gjithë vendin pritet të hapen 5417 Qendra votimi, ndërkohë që mbrëmjen e djeshme KQZ njoftoi se, sipas Kodit Zgjedhor u shpërndanë materialet zgjedhore në 90 KZAZ. Të drejtën për të shkuar te kutia e votimit e kanë 3.464.328 qytetarë shqiptarë. Ata do të vendosin shenjën e tyre në dy fletë votimi: për të zgjedhur kryetarët e 61 bashkive, si dhe parlamentet lokale, pra këshillat bashkiakë.
Në zgjedhje marrin pjesë gjithsej 36 parti. Ato janë të ndara në dy koalicione: Aleanca për Shqipërinë Evropiane drejtuar nga PS dhe që përmban dhe 19 parti të tjera, Koalicioni Shpresa për Ndryshim me 6 parti, e udhëhequr nga Aleanca Kuq e Zi, ndërsa 9 parti garojnë jashtë koalicioneve.
