Kryetari i PD-së, Lulzim Basha, do të jetë sot, në orën 09:00, në Presidencë ku do të ketë një takim me Kreun e Shtetit, Ilir Meta.
Kriza politike në vend pritet të jetë në qendër të takimit, ndërsa palët duken në pozicione të afruara mes tyre.
Kreu i PD-së gjatë ditëve të fundit ka artikuluar dy kushte të panegociueshme, largimin e Edi Ramës nga post ii kryeministrit, dhe përballjen me drejtësinë të të gjithë atyre që rezultojnë në përgjimet e publikuara nga Bild. Por në anën tjetër, Basha me afrimin e 30 qershorit ka ulur tonet, ndërsa nga deklaratat se do të ketë bllokime të procesit, ka ftuar qytetarët që të refuzojnë votimet e Ramës, pra të bojkotojnë procesin.
Kreu i Shtetit anulloi mbajtjen e zgjedhjeve më 30 qershor, një dekret që është mbështetur nga opozita, por nuk njihet nga kryeministri Edi Rama, i cili vijon fushatën dhe është i vendosur për zhvillimin e votimeve, në kushtet kur kontrollon tërësisht edhe KQZ-në, 4 anëtarë të së cilës morën rolin e Gjykatës Kushtetuese, duke rrëzuar dekretin e Presidentit.
Gjithashtu Rama ka refuzuar ftesën e Presidentit për t’u takuar, çka do të thotë se deri në 30 qershor, nuk ka shanse që palët të mund të dialogojnë.
Nëse edhe kryeministri do të pranonte ftesën e presidentit, atëherë në tryezë mund të vihej një datë për zhvillimin e zgjedhjeve.
Në kushtet aktuale, kur nga mazhoranca parlamentare është refuzuar takimi me Presidentin, duket se zhvillimet politike priten pas datës 30 qershor.
Deri më tani Presidenti ka zhvilluar takime me drejtues të partive të vogla, në aleancë me PD dhe PS, në përpjekje për të dakordësuar një datë zgjedhjesh, duke qenë se ligjërisht 30 qershori ka rënë.
Por fakti se ftesa e Metës është refuzuar nga Rama, vështirë që para 30 qershorit, presidenti të nxjerrë një datë për mbajtjen e zgjedhjeve.
