Xhelal Mziu, kryebashkiaku i Kzmës, në nje lëtër dërguar KQZ-së dhe për dijeni të Ministrit të Brendshëm, Prefektit të Qarkut Tiranë, Prezencës së OSBE-së si dhe KZAZ nr.27 dhe 28 Bashkia Kamëz, shprehet se do të ndjeke me rigorozitet dekretin e Presidentit që rrëzoi 30 qershorin si datën e zgjedhjeve lokale.
Në letrën që mban firmën e Mziut, thuhet se “Komisioni Qendror Zgjedhor nuk ka tagër ligjor që të gjykojë mbi Dekretet e Presidentit për sa i përket datës së zgjedhjeve. Nëse Komisioni Qendror i Zgjedhjeve ka rezervat e tij ligjore për Dekretet e Presidentit, mund t’i drejtohet vetë kryesisht këtij institucioni (Presidentit)”.
Zbatimi i Dekretit nr.11199, datë 10.06.2019 të Presidentit të Republikës së Shqipërisë nga ana e qeverisjes vendore Bashkia Kamëz, është një detyrim ligjor dhe aq më tepër kushtetues, thuhet më tej në letrën që mban datën e sotme dhe firmën e krybashkiakut Mziu.
Po sot, Kolegji Zgjedhor rrëzoi kërkesën e Partisë së Unitetit Kombëtar për çregjistrimin nga zgjedhjet. Vendimi i Kolegjit mund të interpretohet nga mazhoranca e majtë si një hap pro mbajtjes së zgjedhjeve në 30 qershor, megjithëse sipas opozitës, kjo gjykatë nuk ka të drejtë të shprehet për kushtetutshmërinë ose jo të dekretit të Presidentit. Sipas tyre, për dekretin e Presidentit shprehet vetëm Gjykata Kushtetuese.
