Gjykata ka vendosur masën e sigurisë “arrest me burg” për hasan Kanaçin. Ky i fundit u arrestua në kuadër të hetimeve që po kryhen për zbardhjen e grabitjes së ndodhur në pistën e aeroportit “Nënë Tereza”. Kanaçi është personi i 7 i arrestuar lidhur me grabitjen.
Kanaçi ishte punonjës i Aeroportit të Rinasit, ndërsa grupi hetimor dyshon se punonjësi ka njoftuar Admir Muratajn për futjen e blindave me para brenda aeroportit.
Hasan Kanaçi punonte në zonën e përpunimit të mallarave e parave dhe kishte dijeni për futjen e blindave me para në Rinas. Dyshohet se ai ka patur lidhje me grupin e Admir Muratajt e Klement Çalën, ku kanë bashkëpunuar për të kryer grabitjen.
“Nga Sektori për Krime të Rënda në Drejtorinë Vendore të Policisë Tiranë në bashkëpunim me Prokurorinë pranë Gjykatës Shkallës Parë për Krime të Rënda, në bazë të veprimeve hetimore të kryera, informacioneve të marra në rruge operative si dhe provave të siguruara gjatë hetimit, është bërë i mundur zbulimi, dokumentimi dhe ndalimi një tjetri autor të dyshuar të kësaj ngjarje kriminale e konkretisht i shtetasit: H.K., 48 vjeç, lindur dhe banues në Tiranë. Jane sekuestruar në cilesinë e provës materiale një sasi e konsiderueshme vlerë monetare në valutë dhe në lekë, njoftoi policia. Materialet proceduriale i kaluan Prokurorisë Pranë Gjykatës Shkallës Parë për Krime të Rënda Tiranë për veprat penale ‘Vjedhje me armë kryer në bashkëpunim’, ‘Grupi i strukturuar kriminal’, ‘Prodhim dhe mbajtje pa leje e armëve të ftohta’, ‘Mbajtje pa leje e armëve, armëve shpërthyese dhe municioneve luftarake’, ‘Vrasje e punonjësve të Policisë së Shtetit e kryer në bashkëpunim e mbetur në tentativë’”, njoftoi policia.
