Prokurorja Cami/ Njeriu i bandës së vjedhjeve të votave në Dibër, pa probleme në KPK

Nga Boldnews.al

Prokurorja e Dibrës, Esmeralda Cami (Keshi) rezultoi pa probleme para Komisionit të Vetingut këtë të Hënë, pak para se një person i afërm i saj të shfaqeh në përgjimet e “Bild” si një prej njerëzve kyç në “masakrën” elektorale të Dibrës, në zgjedhjet e pjesshme lokale të vitit 2016.

Prokurorja Cami (Keshi) ka lidhje familjare me Arben Keshin, zyrtarin e lartë të Ministrisë së Brendshme, i cili është përgjuar duke folur me kryeministrin Edi Rama, me Damian Gjiknurin e të tjerë personazhe politikë, për të siguruar vota në favor të Partisë Socialiste.

Arben Keshi është nga Dibra dhe, sipas regjistrit të Gjendjes Civile, rezulton të jetë djali i xhaxhait të Gentjan Keshit, bashkëshort i prokurores Esmeralda Cami.

Kjo e fundit, aktualisht drejtuese e komanduar e Prokurorisë së Dibrës, ka qenë drejtuese e kësaj strukture edhe në vitin 2016, kohë kur u zhvilluan zgjedhjet e parakohshme lokale në këtë qytet, pas arrestimit të Shukri Xhelilit.

Përgjimet e publikuara së fundmi nga “Bild” janë pjesë e dosjes “184” të Prokurorisë për Krime të Rënda, e cila ka nisur hetimin pas një kallëzimi të subjektit politik Partia Demokratike.

LEXO EDHE  Grabitja e Rinasit/ Ku ndodhen të shpallurit në kërkim? Zbardhen të dhënat e policisë

Në atë kohë, PD-ja iu drejtua Prokurorisë për Krime të Rënda, pasi, sipas saj, nuk kishte asnjë besim që prokuroria lokale e Dibrës do të hetonte krimet zgjedhore.

Tashmë, nën dritën e përgjimeve, duket se frika e PD-së për mos-kryerjen e hetimeve nga Prokuroria e Dibrës ka qenë e përligjur.

Përgjimet e “Bild”, të publikuara këtë të Hënë, e vendosin Arben Keshin në pjesën më të madhe të komunikimeve. Përfshirja e tij në procesin e tjetërsimit të votave, sipas asaj që dëgjohet në përgjimet e gazetës gjermane, me shumë mundësi do të ndikonte që Prokuroria e Dibrës, e drejtuar nga familjarja e tij, Esmeralda Cami, të mos kryente asnjë hetim.

Cami qëndronte drejtuese e prokurorisë së Dibrës deri në vitin 2017, kur u transferua në prokurorinë e Matit. Pas zgjedhjes së Arta Markut si Prokurore e Përgjithshme e Përkohshme, Esmeralda Cami (Keshi) caktohet sërish drejtuese e Prokurorisë së Dibrës, por kësaj radhe “e përkohshme.

Esmeralda Cami u përball këtë të Hënë me Komisionin e Pavarur të Kualifikimit. Në seancën dëgjimore, trupa e KPK-së raportoi disa problematika të “vogla”, të cilat, me shumë mundësi, nuk do e penalizojnë karrierën e saj.