Përgjimet e publikuar nga prestigjiozja gjermane BILD, kanë tronditur sërish Shqipërinë, duke treguar se shit-blerja e votave dhe shantazhet në zgjedhje janë një fenomen negativ, madje bëhen edhe të rrezikshme kur në to përfshihen zyrtar të lartë të shtetit.
Pas publikimeve në BILD ka ardhur dhe reagimi i gazetares, Sonila Meço, e cila duke bërë një krahasim me ish-presidentin gjerman, ka paralajmëruar edhe dorëheqjen e Ramës.
Meço shkruan, se pavarësisht shantazhit, kërcënimeve dhe “luftës” ndaj gazetarëve të “Bild”, presidenti Wulff i kërkoi falje kryeredaktorit të kësaj gazete dhe dha dorëheqjen disa muaj më pas.
Duke zgjedhur këtë rast, Meço, bën një paralelizëm të kësaj historie, me atë që po bën aktualisht kjo gazetë, e cila ka publikuar disa përgjime të Kryeministrit Rama dhe vartësve të tij, në të cilat flitet për blerje votash në 2016.
Ja postimi i Meços:
Në dhjetor 2011 presidenti gjerman Wulff merr në telefon kryeredaktorin e Bild, Kai Diekmann, një ditë para se tabloidi të publikonte një skandal huamarrjeje të tij.
Wulff, që ndodhej për një vizitë zyrtare në Gjirin Persik lë një mesazh agresiv në sekretarinë telefonike për Diekmann duke e kërcënuar me padi kundër gazetarëve të Bild, nëse publikonin artikullin.
Madje wulff u shpreh për një “luftë” të vërtetë me Bild.
Wulff madje u përpoq të ndërhynte duke telefonuar Matthias Doepfner, Drejtorin e Axel-Springer, që zotëron si shtëpi botuese ndër të tjera edhe Bild. I përsëriti të njëjtin kërcënim, hapa ligjorë kundra gazetarëve të Bild.
Dy ditë më vonë, Wulff i kërkoi ndjesë kryeredaktorit të Bild. Artikujt u publikuan.
Në shkurt 2012 Wulff dha dorëheqjen.
