Pas Denar Bibës, Bledar Skënderi, një tjetër anëtar i KQZ-së, i zgjedhur me votat e PS në atë post, flet publikisht kundër vendimit të Presidentit që rrëzoi 30 qershorin, si datën e zgjedhjeve lokale.
Dhe jo vetëm kaq, por e bën me një fjalor thuajse motamo, të cilin kryeministri Edi Rama dhe rilindasit e tjetër e përdorin në mitingjet e tyre për “zgjedhjet e 30 qershorit”, edhe pse data është rrëzuar me dekret të kreut të shtetit.
Në stilin “Vangjush Dako”, shprehet se “një sulm frontal dhe i paparë ndonjëherë” ka filluar” ndaj tij dhe anëtareve të tjerë socialistë të KQZ-së. Më tej pretendon se është “ushtar i Atdheut”, e në fund citon shefin e Rilindjes.
“Për të gjithë ata që duan t’i venë flakën Shqipërisë, për ambiciet e tyre personale për pushtet kam vetëm një përgjigje: Historia ka për t’ju dënuar”, shkruan Bledar Skënderi në një shënim në profilin e tij në Facebook.
Bledar Skënderi është ndër katër anëtarët e KQZ-së që me votën e tyre në Komisionin Qendror të Zgjedhjeve injoruan dekretin e Presidentit Ilir Meta për shtyrjen e datës së zgjedhjeve. Në mbledhjen e parë të KQZ-së pasi në këtë institucion u depozitua dekreti, Bledar Skënderi, ashtu si nënkryetari Denar Biba dhe dy anëtaret e tjera socialistë, Edlira Jorgaqi dhe Rezarta Bitri, e quajtën antikushtetues vendim e Metës dhe nuk e morën parasysh.
Një ditë më parë, Presidenti Meta, në një prononcim për gazetarët, duke iu referuar pikërisht vendimmarrjes së KQZ-së, apeloi qartë se çdo institucion që refuzon zbatimin e dekretit të Presidentit do të përballet me pasoja ligjore.
Megjithatë, deri më tani, nga ana e socialistëve të KQZ-së nuk ka asnjë reflektim. Jo vetëm kaq, por ata kanë paralajmëruar ndjekje penale për kryetarët e bashkive, që kanë nisur zbatimin e dekretit të Presidentit Meta. /BN/
