Anëtarët socialistë në KQZ shpërfillin vendimin e Presidentit Meta i cili ç’dekretoi 30 qershorin si datë të zgjedhjeve lokale.
Klement Zguri, kryetar i KQZ-së braktisi mbledhjen e KQZ-së ku po diskutohej dekreti i Presidentit Ilir Meta për të rrëzuar 30 qershorin si datën e zgjedhjeve lokale. Para se të largohet, Zguri u shpreh se diskutimi i dekretit të Presidentit është një lloj sfide që bëhet nga KQZ.
“Unë nuk jam Gjykatë Kushtetuese që të vlerësoj dekretin e Presidentit. Për mua është detyrues dhe më duhet të respektoj vullnetin e tij. A mundemi ne të refuzojmë një vullnetin të tillë?! Për mua është një lloj sfide që i bëhet dekretit të Presidentit. Se gjej me vend se mundem të drejtoj një mbledhje kur ka debate kaq të forta dhe për mua pa sens juridik, që të diskutohet në tavolinën e KQZ. Për të qenë i qetë vetë në këtë paqartësi të madhe që ka zënë vendin, unë jam i detyruar të ngrihem. Kolegët e mi nëse e shikojne se jane te njejten logjike me mua mund të bashkohen”, tha ai.
Më pas, fjalën e mori nënkryetari Denar Biba, i cili e quajti të paligjshëm dekretin e Metës. “KQZ ka detyrim ti çojë shqiptarët, qofshin 2, 20 apo 200 që duan të votojnë, ti sigurojmë ushtrimin e kësaj të drejte”, deklaroi.
Edhe anëtarë të tjerë, të gjithë të zgjedhur nga PS, mbështetën deklaratën e Denar Bibës. Mbledhja e KQZ u thirr pikërisht nënkryetari i KQZ-së Denar Biba dhe anëtari Bledar Skënderi (të dy të zgjedhur nga PS).
Katër anëtarët socialistë të mbetur në mbledhjen e KQZ-së pas largimit të kryetarit Klemend Zguri, kanë votuar për shpërndarjen e fondit monetar për partitë politike pjesëmarrëse në zgjedhjet lokale. Vendimi me 4 vota pro vjen në një kohë kur Presidenti Ilir Meta vendosi shtyrjen e zgjedhjeve lokale. /bn/
