Partizani ka mbetur pa trajner që nga data 1 qershor, por ndonëse janë lakuar shumë emra dhe janë zhvilluar raunde bisedimesh në Itali, “Panorama Sport” raporton se pasuesi i Skënder Gegës është projektuar me kohë.
Emërimi i Adolfo Sormanit në krye të stolit të kuq shikohet thjesht çështje orësh, pasi pakti me 53-vjeçarin italian është arritur me kohë. Largimi i Gegës u servir si një zgjidhje marrëveshjeje me mirëkuptim nga palët, për arsye familjare të trajnerit, por në këtë rast ka një prapaskenë që tregon se marrëdhëniet nuk kanë qenë “vaj” te kampionët e rinj të Superiores. “Panorama Sport” ka arritur të zbulojë se kontaktet me ish-trajnerin Sormani kanë nisur që në janar, gjatë fazës përgatitore të zhvilluar në Turqi.
Asokohe skuadra daneze Velje e drejtuar nga italiani e kreu fazën përgatitore afër të kuqve dhe që atë kohë është biseduar për rikthimin e mundshëm të 53-vjeçarit. Me kohë është raportuar se në atë periudhë ka pasur një mosmarrëveshje mes trajnerit Gega dhe drejtuesve për emrat e merkatos dhe hyrja në kontakte me Sormanin tregon se është medituar me kohë zëvendësuesi i ish-mbrojtësit që ktheu titullin pas 26 viteve.
Pozitat e Gegës te Partizani u lëkundën shumë pas eliminimit nga Kupa dhe humbjes 3-1 që Luftëtari i shkaktoi Partizanit në kryeqytet më 6 prill. Pas kësaj disfate është menduar afrimi i menjëhershëm i Sormanit, i cili kishte dalë i lirë që më 5 mars, ku u largua nga danezët e Veljes. Gjithsesi, rrethanat e bënë që Gega ta mbyllë sezonin si trajner kampion, por vazhdimësia pritet t’i besohet ish-trajnerit Adolfo Sormani, i cili do të mbërrijë te Partizani së bashku me Ylber Ramadanin, një tjetër “ish” që ai e mori me vete në Danimarkë dhe bashkëpunoi për dy sezone te Velje.