Ish-Ministri i Shtetit në mandatin e parë të Ramës dhe ish-kryetar KQZ-së, Ilirjan Celibashi ka komentuar vendimin e presidentit Ilir Meta për të shtyrë datën e zgjedhjeve.
I ftuar në ‘Tempora’, Celibashi ka deklaruar se meta e ka marrë këtë vendim për të mirën e shqiptarëve, në mënyrë që të mos shkojnë në luftë civile.
‘Jemi në një krizë të thellë politike, palët në qëndrimet dhe veprimet e tyre janë larg njëra tjetrës dhe në raport me interesin publik, ky interes nuk gjenë mishërim në këtë konfliktualitet.
Duhet të dëgjohet zëri i çdo qytetari. Shumë e rëndësishme se si adresohen shqetësimet.
Akti i presidentit dekreti i tij për të anuluar datën e zgjedhjeve, është një akt që nuk gjen mbështetje në Kushtetutë dhe në Kodin Zgjedhor.
Unë nuk gjej arsyen që të mendoj që në këtë akt ai nuk është nisur nga një qëllim i mirë, nga e mira e përbashkët.
Ai ka dashur të kontribuojë për mirë në të, por palët tashmë janë më larg nga njëra tjetra dhe konflikti politik nuk erdhi më i zbutur por më i acaruar.
Ne ishim në një krizë dhe vazhdojmë të jemi në një krizë të rëndë politike’, tha Celibashi.
