Avokati Ledio Braho shprehet se vendimi i anëtarëve të KQZ-së për të dalë kundër dekretit të Presidentit Ilir Meta për shtyrjen e zgjedhjeve lokale, është antikushtetues. Në një intervistë për “Shijak Tv”, ai sqaroi se ata anëtarë të KQZ-së mund të ndiqen penalisht për shpërdorim detyre: “Mund të ketë dhe elementë të shpërdorimit të detyrës për ata anëtarë të KZQ”.
“KQZ absolutisht s’ka asnjë mënyrë dhe asnjë hapësirë ligjore që të interpretuar apo gjykuar dekretin e presidentit. i vetmi institucion që mund të gjykojë një dekret të tillë të presidentit është Gjykata Kushtetuese që sot nuk funksionon”, tha ai.
“Në kushtet e mungesës së Gjykatës Kushtetuese nuk ka asnjë organ tjetër kompetent”, shtoi.
“Sado të mundohet KQZ të marrë vendime më shumicë votash, po ashtu edhe apo Kolegji Zgjedhor që ndoshta nën trysninë e vetingut të mund të marrë një vendim që të jetë mazhorancës, i gjithë procesi do jetë antikushtetues. Pra ne do zhvillojmë zgjedhje në 30 qershor, që do jenë antikushtetuese”, u shpreh.
Administrativja mundet të shkarkojë Metën?
Avokati Braho del kundër qëndrimeve se Gjykata Administrative mund të gjykojë dekretin e Metës për rrëzimin e 30 qershorit si datë e zhvillimit të zgjedhjeve lokale, në kushtet kur mungon Gjykata Kushtetuese.
“Të njëjtat zëra që qarkullojnë lidhur me mundësinë e gjykimit të dekretit në Gjykatën Administrative janë krejtësisht të paligjshme, sepse s’mundte që Gjykata Administrative të trajtojë apo interpretojë çështje që kanë të bëjnë me dekrete të kësaj natyre, siç është dekreti për përcaktimin e datës së zgjedhjeve”, tha. /BN/
