Partia Demokratike pritet të mbledhë kryesinë pasditen e sotme lidhur me situatëm politike në vend. Burime thanë se pasditen e sotme në orën 18:00 Basha do të ketë një takim me aleatët, e më pas në orën 19:00 Partia Demokratike do të mbledhë Kryesinë. Mësohet se nesër pritet mbledhja e strukturave te tjera te partise, grupit parlamentar dhe Kolegjit të Kryetareve.
Lëvizja vjen në një kohë kur PS ka nisur procedurat për shkarkimin e Presidentit Ilir Meta. Partia Socialiste ka nisur pas mesditës së kësaj të hëne, mbledhjen e firmave të deputetëve, për të çuar në Kuvend kërkesën e mazhorancës për shkarkimin e presidentit Ilir Meta, që pasoi vendimin e Kreut të Shtetit për të anuluar pa afat datën e zgjedhjeve vendore të parashikuara për më 30 Qershor. Firmat e para sapo janë hedhur nga anëtarët e Komisionit te Ligjeve. Ky është hapi i parë për të filluar procedurën e shkarkimit të Presidentit, për të kaluar në seancë plenare ku kërkohen 2/3 e votave, 94 vota. Elisa Spiropali, zëdhënësja e qeverisë, tha se në seancën e të enjtes do zhvillohet procedura për shkarkimin i Metës. Ndërkohë, nga opozita e re ka pasur një përgjigje pozitive për të bashkuar votat për shkarkimin e Metës.
Megjithatë, ekspertë të ligjit argumentojnë se edhe nëse shkarkohet nga parlamenti, fjalën e fundit duhet ta thotë Gjykata Kushtetuese, që aktualisht është inekzistente.
Po sot, anëtaret socialistë që përbëjnë shumicën në KQZ, injoruan vendimin e Presidentit Ilir Meta për shtyrjen e zgjedhjeve, duke e quajtur të jashtëligjshëm. /bn/