Nga Boldnews.al
Kryeministri Edi Rama e ka parashikuar prej dy javësh lëvizjen e Presidentit Ilir Meta, për shtyrjen e zgjedhjeve.
Prej dy javësh ai ka krijuar një grup pune, i cili kishte për detyrë të gjente zgjidhjet kushtetuese dhe ligjore, për t’iu përgjigjur një lëvizje të mundshme të Metës, për ç’dekretimin e 30 Qershorit si datë të zgjedhjeve vendore.
Reagimi i çoroditur i vetë Ramës dhe Taulant Ballës mbrëmjen e së shtunës, kur kreu i Shtetit njoftoi për zhbërjen e “30 Qershorit” dëshmon se grupi i punës kryeministror nuk ia ka arritur qëllimit.
Juristët e Ramës, me shumë mundësi, nuk kanë bazë kushtetuese dhe ligjore për të kundërshtuar vendimin e Metës.
E, në këto kushte, Rama dhe pasuesit e tij po përgatiten të “godasin” Presidentin me mjetet ligjore më te kuptueshme, të cilat janë njëkohësisht jo-efikase.
Varianti i parë është që, të hënën, pasi Meta të zyrtarizojë dekretin për zhbërjen e datës së zgjedhjeve, Parlamenti me shumicë socialiste të rrëzojë vendimin e Presidentit.
Për këtë situatë, juristët ndajnë qëndrime të ndryshme. Një pjesë mendojnë që, nëse Parlamenti rrëzon dekretin, atëherë Presidenti ka të drejtë t’i drejtohet Gjykatës Administrative.
Disa të tjerë janë të mendimit se ky rast nuk përbën një situatë “burokratike administrative”, por hyn në sferën e konfliktit të kompetencave mes Presidentit dhe Parlamentit. Dhe, në këto raste, vendimin e merr Gjykata Kushtetuese, e cila nuk ekziston për momentin.
Nëse fiton varianti i parë, pra shqyrtimi i rastit në Gjykatë Administrative, vendimi i saj, me shumë mundësi, do të jetë në disfavor të Presidentit.
Me vetingun “nëpër këmbë”, vështirë të gjendet një gjyqtar që mund t’i dalë kundër Qeverisë së Edi Ramës.
Duke vijuar këtë logjikë, nëse Meta rrëzohet në Administrative, atëherë ai mund të bëjë lëvizjen “in-extremis”, duke dekretuar shpërndarjen e Parlamentit.
Argumenti kushtetues, në një rast të tillë, ekziston. Ligji themeltar i Shtetit parashikon që Parlamenti përbëhet nga 140 deputetë, shifër e cila nuk mund të plotësohet aktualisht.
Varianti i dytë i Ramës kundër Metës është inicimi i procedurës për shkarkimin e Presidentit.
Ky variant është më i pamundur, në kushtet aktuale. Kushtetuta parashikon se Presidenti shkarkohet me 2/3 e deputetëve (93 vota) dhe shqyrtohet nga Gjykata Kushtetuese.
Rama nuk ka 93 vota. Por, edhe nëse i siguron nga “opozita” e Rudina Hajdarit, vendimi i tyre nuk mund të konfirmohet në Gjykatën Kushtetuese.
Varianti i tretë i Ramës, gjithashtu i pamundur, është zhvillimi i zgjedhjeve në 30 qershor, në kundërshtim me Kushtetutën.
Ligji themeltar parashikon që zgjedhjet dekretohen nga Presidenti. Nëse Presidenti nuk ka dekretuar (ç’dekretuar) datën e zgjedhjeve, atëherë zgjedhje nuk ka.
Kryeministri Rama, menjëherë pas njoftimit të Metës për ç’dekretimin e datës së zgjedhjeve, u shfaq i bindur se, në skakierën e shahut politik, ai është “tre lëvizje para kundërshtarëve të tij”.
Kjo deklaratë duket më shumë një bllof, pasi Kushtetuta dhe sidomos mungesa e Gjykatës Kushtetuese, e vendosin kryeministrin, të paktën një hap pas.
