Gazeta gjermane “Bild” publikoi sot 6 përgjime, pjesë e dosjes 339, ku zbardhet skema e shit/blerjes së votave në Qarkun e Durrësit.
Më konkretisht në përgjimet e sotme, shfaqet Vangjush Dako, kryebashkiaku aktual i Durrësit, i cili komunikon me Avdylajt, që janë në dijeni jo vetëm të lëvizjeve të tij, por edhe të kryeministrit Edi Rama. Madje në përgjimet e publikuara, duket se ata kontrollojnë drejtuesit e disa prej institucioneve, madje duke i urdhëruar ato.
Përgjimet tregojnë lidhjet direkte që Astrit Avdylaj, kreu i grupit, mbante me kryetarin e Bashkisë së Durrësit Vangjush Dako, por dhe me kandidatin aktual të Partisë socialiste për Bashkinë e Shijakut Elton Arbana, si dhe angazhimin e Avdylajt për të siguruar vota për Partinë socialiste dhe një prej kandidatëve të saj, deputetin aktual Ilir Ndraxhi.
Lidhur me përgjimet e publikuara sot, ka reaguar edhe anëtari i Kryesisë së PD-së, Tomor Alizoti.
Përmes një postimi në rrjet, ai shkruan se vjen një kohë kur njerëzit shohin të vërtetën dhe i japin shkelmin qeverisë, ndërsa i drejtohet edhe kryeministrit Rama me fjalët: “Ti nuk ke turp të japësh dorëheqjen, madje nuk je as burrë! Por, shqiptarët nuk do të lejojnë!”.
“Publikimi i pëgjimeve nga gjigandi gjerman Bild, në të cilat vertetohet lidhja e qeverisë Rama, e atij vetë me krimin dhe trafikantët si dhe blerja e votave është fundi i shëmtuar i kësaj mazhorance qeverisëse që i poshtëroi, vodhi, detyroi të braktisin vendin dhe zhyti në dëshpërim shumë shqiptarë. Vjen një kohë kur rrëzohesh, vjen një kohe kur njerëzit shohin të vërtetën dhe i japin shqelmin qeverisë që mbërrin në kufirin ku arriti Rama.
Rama ik! Duhet të kishe ikur që diten që rezultove bashkëpunues me ministra të inkriminuar, me deputetë të përfshirë në skandale! Ti nuk ke turp të japësh dorëheqjen, madje nuk je as burrë! Por, shqiptarët nuk do të lejojnë!”, shkruan Alizoti në reagimin e tij.
